Ідэолагі назвалі грамадзянскі шлюб і змену партнёраў “рэальнасцю, якая палохае” і пагрозай нацыянальнай бяспецы
15 кастрычніка, Позірк. “Навязваемыя звонку “навамодныя” каштоўнасці (бяздзетнасць, “лакшары” жыццё, спрошчаныя формы сямейных стасункаў і інш.) нясуць у сабе сур’ёзныя выклікі і могуць прывесці да дэмаграфічных праблем, паслаблення інстытута сям’і і размывання традыцыйных сямейных каштоўнасцяў і арыенціраў. Усё гэта з’яўляецца ключавымі пагрозамі нацыянальнай бяспецы ў многіх дзяржавах, уключаючы Беларусь“. Такое сцвярджэнне змяшчаецца ў метадычных матэрыялах, падрыхтаваных НДІ тэорыі і практыкі дзяржаўнага кіравання Акадэміі кіравання для інфармацыйна-прапагандысцкіх груп, якія 15 кастрычніка праводзілі штомесячны “адзіны дзень інфармавання насельніцтва“.
На думку ідэолагаў, “спрошчаныя формы стасункаў (напрыклад, грамадзянскі шлюб, змена партнёраў) могуць зніжаць узровень узаемнай адказнасці, што прыводзіць да росту колькасці разводаў і павелічэння колькасці няпоўных сем’яў”.
“Гэта насамрэч страшна. Безумоўна, такая рэальнасць выглядае такой, што пужае”, — лічаць аўтары метадычак.
“Мы не можам гэтага дапусціць, — працягваюць яны. — Таму ў Рэспубліцы Беларусь пытанні дэмаграфічнай палітыкі, уключаючы развіццё чалавечага капіталу, падтрымку сям’і, абарону мацярынства, бацькоўства і дзяцінства, знаходзяцца на пастаянным кантролі кіраўніка дзяржавы“.
Ідэолагі прама заяўляюць аб умяшанні дзяржавы ў асабістае жыццё грамадзян: “У Беларусі, нягледзячы на наяўнасць агульнакультурных маральных традыцый, моладзь часам паддаецца ідэям аб шлюбе і дзецях як аб чымсьці неабавязковым і цяжка сумяшчальным з эгацэнтрычным ладам жыцця, папулярным у інфаполе сацсетак. Адным з такіх прыкладаў з’яўляецца ўстаноўка “пажыць для сябе”, якая не мае на мэце ўступленне ў шлюб, а разам з тым і нараджэнне дзяцей. Такое становішча спраў не можа заставацца па-за ўвагай з боку дзяржавы, таму гэтае пытанне знаходзіцца ў цэнтры ўвагі“.
Хваравітае стаўленне ўладаў да жадання грамадзян самім уладкоўваць сваё жыццё неаднаразова выяўлялася і раней. 31 сакавіка 2023 года ў штогадовым пасланні народу і парламенту Аляксандр Лукашэнка заявіў: “Заходняя мода на чайлдфры, любая папулярызацыя ідэі бяздзетнай сямейнай пары ў нашай інфармацыйна-культурнай прасторы павінна спыняцца. Любыя ўкіды такіх завуаляваных заклікаў, роўна як і ўсе нетрадыцыйныя павевы — не што іншае, як спроба абязлюдзіць і аслабіць дзяржаву. Ніяк не менш. Такая ідэалогія павінна быць па-за законам… Мы выгадавалі дзяцей, якія ні ў чым не мелі патрэбы. І цяпер яны хочуць як мага даўжэй пажыць для сябе, адкладаючы нараджэння дзіцяці. Не ўсе, але тэндэнцыя ёсць. Яна небяспечная. Парадыгму такога мыслення трэба мяняць”.
У канцы снежня таго ж года на нарадзе па пытаннях маладзёжнай і кадравай палітыкі, якая прайшла ў Гомельскім аблвыканкаме з удзелам яго старшыні Івана Крупко і першага намесніка кіраўніка адміністрацыі Лукашэнкі Максіма Рыжанкова (цяпер міністр замежных спраў), было заяўлена (цытата паводле дзяржаўнай газеты “Гомельская праўда“): “Што тычыцца ўмацавання традыцыйных сямейных каштоўнасцяў, то тут не абысціся без маштабнай працы на ўсіх узроўнях, пачынаючы з дзіцячага садка. Уключацца павінны не толькі адукацыя, ідэалогія, БРСМ, але і палітычныя партыі, грамадскія арганізацыі, СМІ. І тыя ж кіраўнікі прадпрыемстваў, якім трэба падаваць прыклад і заахвочваць любымі спосабамі жаданне ствараць нармальныя, здаровыя сем’і і нараджаць дзяцей. Ніякіх “пажыць для сябе”, дацягнуць да сарака і гэтак далей. Дзейнічаць тут і цяпер — браць на сябе адказнасць за каханага чалавека. І ўсімі шляхамі спыняць згубную для любога грамадства псіхалогію чайлдфры <…> — моднае сягоння плынь, вобраз думак, якія разумеюць прынцыповую адмову ад падаўжэння роду“.
15 красавіка 2026 года Лукашэнка падпісаў закон “Аб змене кодэксаў у пытаннях адміністрацыйнай адказнасці“, якім уведзеная адказнасць за “прапаганду гомасэксуальных стасункаў, змены полу, педафіліі і бяздзетнасці”: для фізічных асобаў — штраф да 20 базавых велічынь (цяпер 900 рублёў), пры здзяйсненні ў дачыненні да непаўналетняга — да 30 (1.350) або адміністрацыйны арышт; для індывідуальных прадпрымальнікаў — да 100 (4.500), для юрыдычных асобаў — ад 100 да 150 (ад 4.500 да 6.750).
У той жа дзень незалежныя эксперты ААН апублікавалі заяву, у якой адзначылі, што закон, які прадугледжвае “адказнасць за распаўсюд інфармацыі, якая лічыцца “прапагандай“ аднаполых стасункаў паводле ўзаемнай згоды, медыцынскай дапамогі трансгендарным асобам або рэпрадуктыўнай аўтаноміі“, прывядзе да “інстытуцыяналізацыі дыскрымінацыі і значнага павышэння рызык рэпрэсій“ у Беларусі.
Гл. таксама:
