У Мінскім раёне заўважаныя двое школьнікаў, якія ехалі на цягніку, зачапіўшыся за вагон — міліцыя праводзіць праверку
15 кастрычніка, Позірк. Камеры відэаназірання на чыгуначнай станцыі Калодзішчы (Мінскі раён) зафіксавалі двух школьнікаў, якія ехалі на цягніку, зачапіўшыся за вагон, вынікае з інфармацыі прэс-службы УУС Мінаблвыканкама.
Старшы інспектар групы грамадскай бяспекі на транспарце абласнога УУС Таццяна Субач у відэакаментарыі, апублікаваным 15 кастрычніка ў тэлеграм-канале МУС, паведаміла, што па гэтым факце праводзіцца праверка. “Дзеянням парушальнікаў будзе дадзеная прававая ацэнка”, — заявіла яна.
Прадстаўніца тэрытарыяльнага ўпраўлення міліцыі адзначыла, што ад пачатку года ў Мінскай вобласці зарэгістравана 15 такіх выпадкаў.
Прэс-служба УУС Мінаблвыканкама назвала гэтую з’яву — зачэпінг — “смяротна небяспечным і незаконным захапленнем, якое ўяўляе сабой праезд на падножках, дахах або ў іншых не прызначаных для пасажыраў месцах цягніка”.
Раней “Позірк” паведамляў, што ў матэрыялах для выкарыстання прапагандыстамі і чыноўнікамі ў рамках ліпеньскага “адзінага дня інфармавання” насельніцтва “галоўным ворагам бяспекі” на аб’ектах Беларускай чыгункі (БЧ) для моладзі названы зачэпінг. За апошнія тры гады на той момант на БЧ у выніку такога занятку былі траўмаваныя 11 непаўналетніх.
“Пры гэтым моладзь не разумее небяспекі таго, што можа здарыцца. Гэта не толькі падзенне з цягніка падчас руху, але і ўдар электрычным токам пры праездзе па электрыфікаваным участку, пры спробе заскочыць на дах цягніка з моста, у выніку дакранання або занадта небяспечнага набліжэння да кантактнай сеткі і г.д.”, — гаварылася ў матэрыялах.
Ідэолагі паскардзіліся, што “з кожным годам з’яўляюцца ўсё больш экстрэмальныя “захапленні” ў моладзевым асяроддзі”, “падлеткі часта рызыкуюць здароўем і жыццём, каб даказаць сваю крутасць, атрымаць вострыя адчуванні або зрабіць непаўторнае фота”.
Пры гэтым распрацоўшчыкі матэрыялаў прызналі, што аднымі забаронамі праблему не вырашыць, і прапанавалі разумную, на іх думку, альтэрнатыву: экстрэмальныя віды спорту, ваенна-спартыўныя клубы і профільныя класы МНС.
