15 кастрычніка, Позірк. Новая рэдакцыя правілаў уезду, знаходжання і выезду імігрантаў зацверджаная пастановай урада Казахстана ад 10 кастрычніка 2026 года, паведамляе Zakon.kz.
Абноўлены дакумент набудзе моц 24 кастрычніка. У адпаведнасці з ім уводзіцца сістэма электронных дазволаў на ўезд для грамадзян шэрагу краін, у тым ліку дзяржаў Еўразійскага эканамічнага саюза, членам якога з’яўляецца Беларусь.
Сістэма ўкараняецца паэтапна. З 1 лістапада яна мае запрацаваць у аэрапорце Актау і чатырох аўтамабільных пунктах пропуску, з 1 студзеня 2027 года — у аэрапортах Астаны і Алматы, з 1 сакавіка — у астатніх пунктах пропуску. З 1 ліпеня 2027-га атрыманне электроннага дазволу стане абавязковым, а яго адсутнасць — падставай для адмовы ва ўездзе ў Казахстан.
Электронны дазвол праз лічбавую платформу QazETA будуць бясплатна выдаваць органы ўнутраных спраў на ўзгадненне з органамі нацыянальнай бяспекі.
Паведамляецца, што заяву на атрыманне дазволу трэба будзе падаваць не пазней як за 72 гадзіны да запланаванай даты ўезду. Пры падачы неабходна прайсці ідэнтыфікацыю або аўтэнтыфікацыю.
Выдадзены дакумент будзе дзейнічаць 180 каляндарных дзён.
