Эстонія можа забараніць набываць нерухомасць беларусам, якія не маюць пастаяннага дазволу на жыхарства ў краіне — СМІ

28 красавіка, Позірк. Аб падрыхтоўцы Міністэрствам унутраных спраў Эстоніі паправак да закона аб абмежаванні на набыццё нерухомасці ў краіне паведаміла Эстонская грамадская тэлерадыёвяшчальная кампанія (ERR).

Паводле звестак ERR, у тлумачальнай запісцы МУС адзначае, што мэтай паправак з’яўляецца “абмежаванне магчымасці варожых дзяржаў або асоб, якія знаходзяцца пад іх кантролем, выкарыстоўваць нерухомасць для выведкі і дзейнасці па аказанні ўплыву, накіраванай супраць Эстоніі, альбо для дыверсійных аперацый“.

Праектам ствараецца норма паўнамоцтваў, на падставе якой у кантэксце абмежаванні набыцця нерухомасці будуць вызначацца вышэйназваныя дзяржавы. Паводле інфармацыі ERR, гэтая норма дазволіць забараніць набыццё нерухомасці на тэрыторыі Эстоніі грамадзянам Беларусі і Расіі без пастаяннага дазволу на жыхарства, кампаніям гэтых дзяржаў, а таксама юрыдычным асобам, у якіх яны з’яўляюцца фактычнымі бенефіцыярамі.

Пры гэтым, гаворыцца ў тлумачальнай запісцы, “забарона не мае зваротнай моцы і не тычыцца асоб, якія маюць доўгатэрміновы дазвол на жыхарства, паколькі іх біяграфія правераная дзяржавай у дастатковай ступені“.

Паведамляецца, што “абмежаванні будуць уніфікаваныя такім чынам, каб распаўсюджвацца і на кватэрную ўласнасць, якая да гэтага часу знаходзілася па-за сферай прымянення закона аб абмежаванні набыцця нерухомасці”.

“У [закранутым законам] асоб захоўваецца магчымасць арандаваць або здымаць нерухомасць, а ўрад рэспублікі можа паводле значнай для дзяржавы прычыны або з гуманітарных меркаванняў выдаць дазвол на набыццё нерухомасці”, — адзначаецца ў тлумачальнай запісцы.

Абмежаванне закране прыкладна 600 здзелак у год, гэта значыць не істотна не паўплывае на рынак нерухомасці, лічаць аўтары праекта.

Адзначаецца, што праект абапіраецца на практыку Фінляндыі, Латвіі і Літвы, якія таксама зрабілі больш жорсткім парадак набыцця нерухомасці асобамі з трэціх краін з меркаванняў бяспекі.

Чакаецца, што закон у выпадку яго прыняцця набудзе моц 1 студзеня 2027 года.

Паводле даных ERR, на красавік 2025 года сярод уладальнікаў нерухомасці ў Эстоніі было 896 грамадзян Беларусі. На 9 студзеня 2026 года ў Эстоніі пражывала 1.476 грамадзян Беларусі з часовым дазволам на жыхарства і 1.190 — з пастаянным.

У чэрвені 2025 года парламент Латвіі прыняў закон, які забараняе фізічным і юрыдычным асобам з Беларусі і Расіі набываць нерухомасць у гэтай балтыйскай дзяржаве.

У ліпені таго ж года закон, які забараняе здзелкі з нерухомасцю для грамадзян Беларусі і Расіі, набыў моц у Фінляндыі.

22 красавіка камітэт Сейма Літвы ў замежных справах ухваліў прапанову звярнуцца да ўрада з просьбай падрыхтаваць папраўкі, якія абмяжоўваюць права расіян і беларусаў набываць нерухомасць у краіне.

У цяперашні час закон аб абмежавальных мерах у сувязі з ваеннай агрэсіяй РФ супраць Украіны забараняе куплю нерухомасці расіянам, у якіх няма дазволу на жыхарства ў Літве.

Кабінет міністраў просяць да 1 кастрычніка падрыхтаваць законапраекты, якія ўстанаўліваюць аналагічныя абмежаванні на набыццё нерухомасці для беларусаў, а таксама забарону для расіян і беларусаў купляць нерухомасць паблізу стратэгічных аб’ектаў Літвы.

Прапанова дазволіць грамадзянам Беларусі і Расіі набываць нерухомасць толькі ў тым выпадку, калі яны з’яўляюцца сталымі жыхарамі Літвы, і абмежаваць куплю паблізу стратэгічных аб’ектаў, была высунутая літоўскімі кансерватарамі.