Мужчына патануў у Верхнядзвінскім раёне

11 кастрычніка, Позірк. Пра ўтапленне ў Верхнядзвінскім раёне (Віцебская вобласць) мужчыны 1975 года нараджэння паведамляе Рэспубліканскае таварыства ратавання на водах (ТРВОД).

Цела загінулага знойдзена ў вёсцы Валынцы за пяць метраў ад берага. Верагодна, гаворка пра раку Дрыса, якая працякае праз гэтую вёску.

Абставіны здарэння высвятляюць следчыя органы, адзначае ТРВОД.

У сярэдзіне ліпеня “Позірк” паведамляў, што, згодна з данымі МНС, за пяць гадоў (2021–2025) у беларускіх вадаёмах патанула 1.984 чалавекі, у тым ліку 132 дзіцяці. Асобна ў 2025-м — 282 (12).

Летась доля патанулых у афіцыйны купальны сезон (з 1 траўня па 30 верасня) склала 56% (дзяцей — 58%). 59% ахвяр перад утапленнем былі ў нецвярозым стане.