Жыхары Гродна асуджаныя за продаж фіктыўных тураў 45 кліентам

29 кастрычніка, Позірк. За продаж 45 кліентам фіктыўных тураў асуджаныя жыхары Гродна, паведамляе Генеральная пракуратура.

Абвінавачванні былі вылучаныя па ч. 3 арт.209 (махлярства) і ч. 3 арт. 222 (незаконны абарот сродкаў плацяжу і (або) інструментаў) Крымінальнага кодэкса.

38-гадоваму абвінавачанаму за восем эпізодаў злачыннай дзейнасці ў дачыненні да 10 пацярпелых прызначана 3 гады пазбаўлення волі з адтэрміноўкай выканання прысуду на 3 гады. Ён таксама аштрафаваны на 300 базавых велічынь (13,5 тыс. рублёў).

37-гадовы абвінавачаны за 41 эпізод злачыннай дзейнасці ў дачыненні да 45 пацярпелых атрымаў 4 гады пазбаўлення волі з адбываннем пакарання ў папраўчай калоніі ва ўмовах узмоцненага рэжыму. Ён аштрафаваны на тую ж суму. Абвінавачаны ўзяты пад варту ў зале суда.

Пацярпелымі па справе прызнана 45 грамадзян ва ўзросце ад 22 да 62 гадоў, у якіх было скрадзена больш за 150 тыс. рублёў.

Згодна з матэрыяламі справы, абвінавачаныя з чэрвеня 2025 года да лютага 2026-га на падставе продажу турыстычных пуцёвак па заніжаных цэнах падчас перапісак у “Інстаграме“, “Телеграме“, “Вайбере“ пераконвалі кліентаў у неабходнасці загадзя аплаціць браніраванне тура. Пры гэтым яны “не мелі намеру выконваць прынятыя на сябе абавязацельствы і не мелі рэальнай магчымасці іх выканання“.

Пасля атрымання перадаплаты зламыснікі “завалодвалі грашовымі сродкамі пацярпелых шляхам банкаўскага пераводу на падкантрольныя банкаўскія рахункі, якія належаць не дасведчаным аб злачыннай дзейнасці грамадзянам”.

Для легалізацыі даходаў абвінавачаныя выкарыстоўвалі рахункі пасярэднікаў і крыпта-біржы. Скрадзеныя грашовыя сродкі часткова абнаяўніваліся ў банкаматах Гродна. Грашовыя сродкі пацярпелых фігуранты трацілі на сябе.

“Віну ў інкрымінаваных злачынствах абвінавачаныя прызналі цалкам, у зробленым раскаяліся, добраахвотна кампенсавалі матэрыяльную шкоду, а таксама заплацілі даход, атрыманы злачынным шляхам“, — паведамляе Генпракуратура.

Прысуд моц не набыў, можа быць абскарджаны і апратэставаны ў апеляцыйным парадку.

28 кастрычніка дзяржСМІ са спасылкай на пракуратуру Савецкага раёна Мінска паведамілі аб набыцці моцы прысудам — 5 гадоў пазбаўлення волі — 22-гадовай уладальніцы турагенцтва ў Мінску. Яна была прызнаная вінаватай у махлярстве ў асабліва буйным памеры. Жанчына ўзяла грошы за туры ў 17 чалавек, але адпачынак ім не арганізавала. Агульная шкода склала 129 тыс. рублёў.

14 студзеня паведамлялася аб узбуджэнні крымінальнай справы па ч. 4 арт. 209 КК супраць 51-гадовай уладальніцы сталічнага турыстычнага агенцтва. Яна абвінавачвалася ў тым, што падманным шляхам завалодала грашовымі сродкамі 29 жыхароў Мінска на агульную суму больш за 250 тыс. рублёў.