Затрыманыя тры меркаваныя наркакур’еры, у тым ліку замежнік — МУС

21 кастрычніка, Позірк. Трое маладых людзей ва ўзросце 16, 19 і 21 года затрыманыя па падазрэнні ў распаўсюдзе наркотыкаў праз інтэрнэт-краму, паведаміла прэс-служба МУС.

Паводле інфармацыі ведамства, у поле зроку супрацоўнікаў наркакантролю Гродзенскай вобласці і 9-га ўпраўлення Галоўнага ўпраўлення па барацьбе з арганізаванай злачыннасцю і карупцыяй МУС трапіў 21-гадовы мінчанін. Яго затрымалі з доказамі злачынства ў лесе ў Мінскім раёне, куды ён прыехаў за чарговай аптовай партыяй наркотыкаў для далейшага продажу.

Міліцыянеры высветлілі асобы яшчэ двух меркаваных закладнікаў, якія працавалі на тую ж інтэрнэт-краму. Маладых людзей затрымалі пры сілавой падтрымцы байцоў асобнага атрада спецыяльнага прызначэння “Беркут” унутраных войскаў МУС. Адзін з затрыманых з’яўляецца замежнікам, яго грамадзянства не называецца.

Усяго з незаконнага абароту канфіскавана 300 г мефедрона, які МУС характарызуе як асабліва небяспечнае псіхатропнае рэчыва.

Паведамляецца аб узбуджэнні крымінальнай справы за збыт наркотыкаў, фігурантам пагражае да 15 гадоў пазбаўлення волі.

Паводле даных Вярхоўнага суда, за першыя шэсць месяцаў 2026 года за звязаныя з наркотыкамі злачынствы асуджана 1.039 чалавек, з іх 666 — за “незаконны абарот без мэты збыту“ (ч. 1 арт. 328 Крымінальнага кодэкса), 314 — за “незаконны абарот з мэтай збыту“ (ч. 2-5 арт. 328 КК).

У 2025 годзе колькасць асуджаных па “наркатычных“ артыкулах КК павялічылася на 7,9% у параўнанні з 2024-м.

За ўчыненне злачынстваў, звязаных з незаконным абаротам наркотыкаў, летась было асуджана 2.253 чалавекі — 8% усіх асуджаных (у 2024-м — 2.088; 6,6%). З іх 2.077, або 92,2%, прызнана вінаватымі па арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.