Польшча зафіксавала спробы парушэння мяжы з боку Беларусі пасля 34 дзён спакою, Літва — пасля 17
21 кастрычніка, Позірк. Пасля 34 дзён спакою (з 16 верасня па 19 кастрычніка) Польшча паведаміла аб 8 спробах незаконнага пераходу мяжы з боку Беларусі.
Паўза паміж штурмамі перапынілася і на беларуска-літоўскай мяжы: 20 кастрычніка адзначана 2 спробы. Гаворка пра інцыдэнт, калі нелегалы збіраліся прабрацца праз водапрапускную трубу, адкрыўшы інструментам металічную браму, але, пачуўшы набліжэнне памежнікаў, вярнуліся на беларускую тэрыторыю.
Пра адсутнасць мігрантаў Служба аховы дзяржаўнай мяжы Літвы паведамляла 17 дзён запар (з 3 кастрычніка), сведчыць пастаянны маніторынг справаздач памежных службаў суседніх краін Еўрасаюза, які праводзіць “Позірк“.
Мяжу з Латвіяй мігранты атакавалі 210-ы дзень запар (з 25 сакавіка). 20 кастрычніка зарэгістравана 32 спробы.
За 20 дзён кастрычніка суседнія краіны ЕС зафіксавалі 630 спробаў нелегальнага пераходу на сваю тэрыторыю з Беларусі.
