Ціханоўская абмеркавала з рэктарам ЕГУ падтрымку беларускіх студэнтаў і будучыню ўніверсітэта
Рэктар ЕГУ Вілюс Шадаўскас на сустрэчы са Святланай Ціханоўскай
21 кастрычніка, Позірк. Падтрымку беларускіх студэнтаў і будучыню Еўрапейскага гуманітарнага ўніверсітэта абмеркавала ў Варшаве дэмакратычны лідар Святлана Ціханоўская на першай сустрэчы з рэктарам ВНУ Вілюсам Шадаўскасам (на пасадзе са студзеня 2025 года), паведамляе яе прэс-служба.
Палітык падкрэсліла, што ЕГУ — вялікі набытак і каштоўнасць для беларускага грамадства і яго неабходна захаваць як беларускі ўніверсітэт у еўрапейскай адукацыйнай прасторы, зберагчы яго беларускую місію і фокус.
Бакі абмеркавалі развіццё беларускіх праграм у межах універсітэта, выкладанне беларускай мовы, большае ўключэнне беларусаў у працэс прыняцця рашэнняў, а таксама правядзенне ў найбліжэйшы час кансультацый пра будучыню універсітэта з прадстаўнікамі беларускай грамадзянскай і акадэмічнай супольнасці.
Паводле Ціханоўскай, важна падтрымаць беларускіх студэнтаў, выпускнікоў і выкладчыкаў ЕГУ, якія ўжо сутыкнуліся з рэпрэсіямі, а многія пасля прызнання ўніверсітэта “экстрэмісцкай арганізацыяй” не могуць вярнуцца дадому.
Разгледжаныя пытанні бяспекі студэнтаў і абітурыентаў, а таксама праблемы легалізацыі для студэнтаў і супрацоўнікаў у Літве.
“У маёй камандзе працуюць і выпускнікі, і выкладчыкі ЕГУ, — адзначыла Ціханоўская. — Я ведаю, як шмат гэты ўніверсітэт даў беларусам, і хачу, каб такую магчымасць мелі наступныя пакаленні студэнтаў. Каб таленавітыя студэнты маглі вучыцца незалежна ад даходаў сям’і, а беларускія выкладчыкі — працягваць сваю працу. І, вядома, нам важна, каб універсітэт захоўваў сваю беларускую місію і фокус”.
“Мы працягнем кансультацыі з кіраўніцтвам універсітэта і, спадзяюся, будзем больш камунікаваць і супрацоўнічаць”, — заявіла дэмлідар.
На пачатак жніўня правабаронцы зафіксавалі 183 факты пераследу па “справе ЕГУ”, 156 з іх — у Беларусі, паведамляў раней праваабарончы цэнтр “Вясна”. Некалькі сваякоў студэнтаў былі асуджаныя па адміністрацыйных справах на 15 сутак.
14 красавіка 2026 года Вярхоўны суд Беларусі прызнаў ЕГУ, які з 2004 года працуе ў выгнанні ў Вільнюсе, і структурныя падраздзяленні, што ўваходзяць у яго склад, “экстрэмісцкай арганізацыяй”, чыя дзейнасць на тэрыторыі краіны забароненая.
16 красавіка МЗС Літвы выказала Беларусі “рашучы пратэст” у сувязі з прызнаннем ЕГУ “экстрэмісцкай арганізацыяй”. Знешнепалітычнае ведамства расцаніла гэтае рашэнне як “палітычна матываванае, неабгрунтаванае, якое парушае прынцыпы міжнароднага права, а таксама суверэнітэт Літоўскай Рэспублікі”. Выпадак, калі вышэйшая навучальная ўстанова, што законна працуе ў іншай дзяржаве, абвяшчаецца “экстрэмісцкай арганізацыяй”, МЗС назваў беспрэцэдэнтным.
Паводле інфармацыі праваабаронцаў, у Беларусі распачатая крымінальная справа за садзейнічанне і фінансаванне “экстрэмісцкай дзейнасці”.
На канец першай дэкады чэрвеня было вядома пра больш як 30 вобшукаў у выпускнікоў, студэнтаў ды іншых асоб, якія маюць дачыненне да універсітэта, а таксама ў іх сваякоў.
Напрыканцы чэрвеня генеральны пракурор Беларусі Дзмітрый Гара заявіў, што “пагалоўна, без разбору прыцягваць да адказнасці, скажам так, студэнтаў, асоб, якія мелі нейкае дачыненне да гэтай арганізацыі, натуральна, ніхто не будзе”.
