На літоўскай мяжы затрыманыя два аўтамабілі з кантрабанднымі цыгарэтамі з Беларусі

21 кастрычніка, Позірк. Аб затрыманні на пункце пропуску Мядзінінкай (з беларускага боку Каменны Лог) двух аўтамабіляў “Аўдзі“ з кантрабанднымі цыгарэтамі беларускай вытворчасці паведаміла 21 кастрычніка Мытня Літвы.

У прыватнасці, увечары 16 кастрычніка грамадзянін Беларусі спрабаваў завезці 1.744 пачкі цыгарэт Minsk Capital у тайніку, абсталяваным у дно Audi Q5. Кошт цыгарэт з улікам падаткаў перавышае 9 тыс. еўра.

Мытнікі выявілі змены ў канструкцыі аўтамабіля з дапамогай рэнтгенаўскай надглядальнай сістэмы. Кіроўца прызнаўся, што меў намер прадаць цыгарэты на рынку.

У Вільнюскім аддзеле мытнай крымінальнай службы распачата дасудовае расследаванне па факце незаконнага абыходжання з падакцызнымі таварамі. Кіроўца паводле рашэння суда змешчыны пад варту на месяц. Аўтамабіль і цыгарэты затрыманыя.

Раніцай 18 кастрычніка ў тым жа пункце пропуску быў затрыманы электрычны Audi e-tron, зарэгістраваны ў Беларусі. Грамадзянін Літвы перавозіў у пярэднім рэчавым адсеку электрамабіля 340 пачкаў цыгарэт Minsk Capital і NZ Gold. Кошт цыгарэт з улікам падаткаў складае 1.873 еўра, аўтамабіля — 24 тыс. еўра.

На кіроўцу складзены пратакол аб адміністрацыйным правапарушэнні за незаконную перавозку тавараў і парушэнне міжнародных санкцый. Адзначаецца, што апошняе звязана з уездам у Літву на аўтамабілі з беларускімі рэгістрацыйнымі нумарамі, паколькі з 18 ліпеня 2024 года ён забаронены (з некаторымі выключэннямі. — “Позірк“.). За парушэнне прадугледжаная адміністрацыйная адказнасць, аўтамабіль можа быць канфіскаваны.