На будаўніцтве станцыі метро ў Мінску загінуў рабочы — у справе разбіраецца СК
19 кастрычніка, Позірк. 40-гадовы рабочы загінуў ранкам 19 кастрычніка на будаўніцтве станцыі метрапалітэна на вул. Максіма Багдановіча ў Мінску, паведамляе прэс-служба Следчага камітэта.
Паводле інфармацыі ведамства, мужчына, “перасоўваючыся па падоўжным поясе мацавання катлавана”, паслізнуўся і з вышыні каля 7 метраў упаў на бетоннае дно будаўнічай пляцоўкі. У выніку падзення рабочы атрымаў смяротныя траўмы.
“Проста цяпер на месцы здарэння працуе следча-аператыўная група, у склад якой увайшлі супрацоўнікі крыміналістычнага аддзела УСК па горадзе Мінску, — гаворыцца ў паведамленні. — Следчымі супольна са спецыялістамі УДКСЭ праводзіцца агляд, фіксуецца следавая карціна, вымаецца дакументацыя па ахове працы і тэхніцы бяспекі”.
Праверкай абставін здарэння займаецца аддзел СК па Савецкім раёне сталіцы. У рамках высвятлення прычын і ўмоў, якія прывялі да гібелі мужчыны, плануецца надаць увагу таму, як датрымліваліся патрабаванні бяспекі пры правядзенні работ.
