Памежнікі Літвы перахапілі чарговы беспілотнік з беларускімі цыгарэтамі

5 кастрычніка, Позірк. Пра перахоп чарговага беспілотніка, які даставіў з Беларусі груз кантрабандных цыгарэт, паведаміла 5 кастрычніка Служба аховы дзяржаўнай мяжы (САДМ) пры МУС Літвы.

Паводле інфармацыі ведамства, гэта адбылося ў ноч на 3 кастрычніка ля вёскі Трыбоніс у Шальчынінкскім раёне, які мяжуе з Беларуссю. Памежнікі пасадзілі апарат з дапамогай антыдронавага абсталявання.

Супрацоўнікі САДМ знайшлі беспілотнік у полі прыкладна за два кіламетры ад мяжы. У скрутку, які быў прымацаваны да дрона, было 320 пачкаў цыгарэт NZ Gold з беларускімі акцызнымі маркамі. Кошт нелегальных тавараў з улікам абавязковых у Літве падаткаў ацэньваецца ў 1.651 еўра.

Распачатая адміністрацыйная вытворчасць. Лятучы апарат і цыгарэты канфіскаваныя.

Паводле даных САДМ, ад пачатку 2026 года літоўскія памежнікі перахапілі ўжо 61 беспілотнік кантрабандыстаў — больш, чым за ўвесь 2025 год (59). У 2024 годзе такіх выпадкаў было 54.