Веласіпедыст загінуў у ДТЗ у Чавускім раёне
25 кастрычніка, Позірк. Аб смяротным дарожна-транспартным здарэнні ў Чавускім раёне паведаміла УУС Магілёўскага аблвыканкама.
Увечары 24 кастрычніка каля вёскі Смолка 55-гадовая кіроўца аўтамабіля “Фальксваген” здзейсніла наезд на 59-гадовага мужчыну, які рухаўся на ровары “ў спадарожным кірунку па цэнтры паласы руху”, адзначае УУС.
Ад атрыманых траўмаў веласіпедыст памёр на месцы здарэння.
Падкрэсліваецца, што ні загінулы, ні яго ровар не былі пазначаныя святлоадбівальнымі элементамі.
У 2025 годзе колькасць дарожна-транспартных здарэнняў у Беларусі знізілася на 5,5% (з 3.453 да 3.262), вынікае з праведзенага “Позіркам” аналізу даных Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўмаваных — на 8,4% (з 3.804 да 3.483).
