Мытнікі Беларусі не дазволілі незаконна вывезці ў Расію больш за 40 т груш
1 кастрычніка, Позірк. Дзве спробы незаконнага вывазу тавараў у РФ, звязаныя з адным перавозчыкам з Беларусі, спынілі гомельскія мытнікі падчас правядзення спецыяльных мерапрыемстваў на беларуска-расійскім участку мяжы.
Паводле інфармацыі Дзяржаўнага мытнага камітэта, кіроўцы грузавікоў, якія належаць адной і той жа кампаніі, паказалі мытнікам дакументы на груз — свежую моркву. Аднак пад ёй былі выяўленыя грушы. Дакументаў і фітасанітарных сертыфікатаў, якія пацвярджаюць бяспеку гэтай садавіны, кіроўцы не мелі.
Адзначаецца, што агулам грузавікі транспартавалі больш за 40 т груш коштам звыш 270 тыс. рублёў.
Гомельская мытня распачала ў дачыненні да перавозчыка адміністрацыйныя працэсы паводле арт. 13.12 КаАП (парушэнне парадку транспартавання тавараў). Артыкулам прадугледжаны штраф — да 50% кошту прадмета правапарушэння.
6 траўня Рассельгаснагляд паведаміў пра затрыманне ў раёне вёскі Каробава (Вяземскі раён Смаленскай вобласці Расіі) аўтамашыны, якая перавозіла з Беларусі каля 18 т груш гатунку “Канферэнцыя” еўрапейскага паходжання.
Адзначалася, што “падчас праверкі высветлена адсутнасць суправаджальных фітасанітарных дакументаў”. “Замест іх інспектарам нагляднага ведамства былі паказаныя дакументы на беларускі пенапласт. Іншыя тлумачэнні пра паходжанне і месца прызначэння грузу кіроўца даваць адмовіўся”, — гаварылася ў паведамленні.
13 лютага паведамлялася, што ад пачатку лютага беларускія мытнікі выявілі сем фактаў незаконнага перамяшчэння ў Расію свежых груш. Усе выпадкі адбыліся падчас спецыяльных мерапрыемстваў паблізу беларуска-расійскай мяжы. Спыненае транспартаванне агулам 140 т груш коштам каля 960 тыс. рублёў (каля 33,5 тыс. долараў).
Раней Рассельгаснагляд паведаміў пра знішчэнне ў перыяд з 21 студзеня па 3 лютага на палігоне ў Пскоўскай вобласці 79,6 т польскіх груш. На тэрыторыю краіны прадукцыя трапіла ў чатырох грузавіках з Беларусі — таксама ў абыход фітасанітарных пастоў і без неабходных дакументаў.
Яшчэ 40,8 тоны ўвезеных з тэрыторыі Беларусі груш было знішчана 4–5 лютага.
4 лютага пра спыненне пастаўкі ў РФ буйных партый груш і корму для жывёл паведаміў Дзяржаўны мытны камітэт.
