За апошні тыдзень у Беларусь уехала больш за 5 тыс. жыхароў еўрапейскіх краін

1 чэрвеня, Позірк. З 25 траўня па 1 чэрвеня ў бязвізавым парадку ў Беларусь уехала 5.087 жыхароў еўрапейскіх краін (з 18 па 25 траўня — 4.901), сведчыць праведзены “Позіркам” аналіз даных Дзяржаўнага пагранічнага камітэта.

За гэты перыяд прыбыло 1.923 грамадзяніны Літвы (1.829), 1.492 грамадзяніны і неграмадзяніны Латвіі (1.354), 800 грамадзян Польшчы (775), 872 грамадзяніны іншых еўрапейскіх дзяржаў са спісу пашыранага бязвізу (943).

З сярэдзіны вясны 2022 года Беларусь наведала 1.339.749 жыхароў Еўропы. З Латвіі прыбыло 428.008 замежнікаў, Літвы — 692.447, Польшчы — 147.919. У рамках пашыранага бязвізу для 35 еўрапейскіх дзяржаў з сярэдзіны лета 2024 года ў Беларусь уехала 71.375 чалавек.

Для жыхароў Літвы і Латвіі бязвізавы рэжым дзейнічае з 15 красавіка 2022 года, Польшчы — з 1 ліпеня таго ж года, яшчэ 35 краін Еўропы — з 19 ліпеня 2024-га.

9 снежня 2025 года Аляксандр Лукашэнка падоўжыў бязвізавы ўезд для грамадзян 38 еўрапейскіх краін да 31 снежня 2026 года ўключна.

Пашыраны бязвіз тычыцца жыхароў Андоры, Аўстрыі, Бельгіі, Балгарыі, Босніі і Герцагавіны, Ватыкана, Венгрыі, Вялікабрытаніі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Люксембурга, Ліхтэнштэйна, Мальты, Манака, Нарвегіі, Нідэрландаў, Партугаліі, Паўночнай Македоніі, Румыніі, Сан-Марына, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.