У Касцюковіцкім раёне мужчына выпадкова стрэліў з ружжа ў сына — 15-гадовы падлетак шпіталізаваны з траўмай жывата
24 траўня, Позірк. Аб шпіталізацыі ў Магілёўскай вобласці непаўналетняга з агнястрэльным раненнем паведамляе Следчы камітэт.
“Раніцай 24 траўня ў вёсцы Бялынкавічы (Касцюковіцкі раён) на тэрыторыі сялянска-фермерскай гаспадаркі 61-гадовы мясцовы жыхар разам з сынам дапамагаў фермеру з забоем кабана. Мужчына выкарыстаў гладкаствольную стрэльбу, якая дасталася яму ў спадчыну, але не была зарэгістраваная”, — адзначае СК.
Паведамляецца, што “падчас стрэлу бацька выпадкова параніў сваё дзіця”.
“З траўмай жывата 15-гадовы падлетак шпіталізаваны, яму аказваецца экстраная медыцынская дапамога”, — гаворыцца ў рэлізе.
На месцы здарэння працуе следча-аператыўная група. Следчым сумесна са спецыялістам Дзяржаўнага камітэту судовых экспертыз па Магілёўскай вобласці праводзіцца агляд. Адзначаецца, што канфіскаваная незарэгістраваная стрэльба, прызначаныя судова-медыцынская і балістычная экспертызы, апытваюцца відавочцы.
“Усе абставіны здарэння будуць устаноўленыя Касцюковіцкім раённым аддзелам Следчага камітэта падчас праверкі. Па яе выніках будзе прынята рашэнне аб узбуджэнні крымінальнай справы”, — паведамілі ў ведамстве.
Гл. таксама:
Мытня выявіла паўсотні боепрыпасаў ва ўвезеным з Літвы красоверы
