Датычны да дыверсіі ў Лейпцыгу грамадзянін Беларусі заехаў у ЕС па візе, атрыманай у Мінску — СМІ

2 верасня, Позірк. Нямецкія следчыя ўстанавілі асобы двух падазраваных у планаваным нападзе на ўкраінскі транспартны самалёт у аэрапорце Лейпцыга (Германія), сярод іх — жыхар Беларусі, піша газета Süddeutsche Zeitung.

Вядучыя нямецкія СМІ (Süddeutsche Zeitung, NDR і WDR) паведамілі пра двух падазраваных у здзяйсненні дыверсіі. Паводле інфармацыі Die Zeit, расследаванне вядзе генеральны пракурор.

Паведамляецца, што падазраваныя — ураджэнец Расіі з латвійскім пашпартам, які можа быць звязаны са спецслужбамі РФ, і “жыхар Беларусі з расійскім пашпартам, які ўжо трапляў у поле зроку паліцыі” ў розных краінах за ўчыненне іншых правапарушэнняў.

Следчым удалося аднавіць маршрут яго ўезду ў Германію і выезду з яе. Паводле звестак SZ, NDR і WDR, падазраваны заехаў па італьянскай турыстычнай візе, выдадзенай у Мінску ў канцы красавіка.

Жыхар Беларусі з расійскім пашпартам, імаверна, быў выканаўцам тэракту. На яго выйшлі па слядах ДНК, пакінутых на дроне, антэне і ўнутраным боку бляшанага слоіка з-пад выбухоўкі. расіянін выступаў каардынатарам.

Абодва падазраваных паспелі пакінуць ЕС, і следчыя скептычна ацэньваюць шанцы прыцягнуць іх да суду.

У ноч на 5 жніўня ў закрытай зоне аэрапорта Лейпцыга быў знойдзены БПЛА з зарадам выбухоўкі. Ён знаходзіўся ў непасрэднай блізкасці ад украінскіх грузавых самалётаў Ан-124 “Руслан”, якія выкарыстоўваюцца для транспарціроўкі зброі і боепрыпасаў для патрэбаў Сіл абароны Украіны.

Пазней высветлілася, што дронаў было мінімум тры. Адзін з іх сутыкнуўся з грузавым самалётам кампаніі DHL, а фрагменты трэцяга з 50 грамамі гексагена быў знойдзеныя 14 жніўня на полі непадалёк.

Германія, рэагуючы на інцыдэнт, абвясціла аб закрыцці апошняга генеральнага консульства РФ у Боне, а таксама аб скасаванні дамовы і закрыцці “Рускага дома” ў Берліне.

Масква традыцыйна катэгарычна абвяргае ўсе абвінавачанні.