Расія вярнула ў Беларусь 150 кг натуральнага мёду

3 верасня, Позірк. Пра спыненне “незаконнага перамяшчэння 150 кг мёду, транспартаванне якога ажыццяўлялася з тэрыторыі Рэспублікі Беларусь”, паведаміла 3 верасня Паўночна-Заходняе ўпраўленне Федэральнай службы РФ па ветэрынарным і фітасанітарным наглядзе (Рассельгаснагляд).

Прычынай стала адсутнасць ветэрынарных суправаджальных дакументаў на натуральную прадукцыю, якія пацвярджаюць яе бяспеку і паходжанне, а таксама маркіроўкі, якая дазваляе ідэнтыфікаваць найменне тавару, вытворцу, тэрмін рэалізацыі, дату вытворчасці і краіну паходжання.

“Перамяшчэнне 150 кг мёду па мытнай тэрыторыі Еўразійскага эканамічнага саюза забаронена, аформлены акт на вяртанне грузу. Тавар вернуты на тэрыторыю Рэспублікі Беларусь”, — гаворыцца ў паведамленні.