Накіраваная ў суд крымінальная справа 21-гадовай жыхаркі Магілёва — абвінавачваецца ў катаванні малалетняй пляменніцы

12 траўня, Позірк. Пракуратура Магілёва накіравала ў суд крымінальную справу 21-гадовай мясцовай жыхаркі, абвінавачанай паводле ч. 2 арт. 154 Крымінальнага кодэкса (катаванне непаўналетняй асобы), паведамляе прэс-служба нагляднага ведамства.

Паводле даных абвінавачвання, у чэрвені 2025 года па просьбе сваёй старэйшай сястры жанчына засталася прыглядаць за малалетнімі пляменнікамі двух, чатырох і шасці гадоў.

“Калі дзеці адмовіліся класціся спаць і не выканалі іншыя патрабаванні сваячкі, маладая жанчына раззлавалася і жорстка збіла шасцігадовую дзяўчынку — нанесла ёй не менш за 20 удараў рамянём з металічнай спражкай па ягадзіцах і сцёгнах, прычыніўшы працяглы боль, а таксама цялесныя пашкоджанні, якія не пацягнулі за сабой кароткачасовага разладу здароўя“, — гаворыцца ў паведамленні.

Адзначаецца, што пасля таго, што здарылася, на загад пракурора трое малалетніх дзяцей прызнаныя асобамі, якія знаходзяцца ў сацыяльна небяспечным становішчы.

Абвінавачаная знаходзіцца пад падпіскай аб нявыездзе.

17 красавіка паведамлялася, што ў дачыненні да 46-гадовага жыхара Віцебска пракуратура абласнога цэнтра ўзбудзіла крымінальную справу паводле ч. 2 арт. 154 КК — за “сістэматычнае нанясенне пабояў сваёй 15-гадовай падчарцы“.

Паводле інфармацыі ведамства, мужчына на працягу некалькіх гадоў “ужываў фізічны гвалт да дачкі жонкі ад першага шлюбу”.