Кіраўнік Мінэканомікі пра планы ўрада на 2027 год: экспарт вырасце на 2,9%, інвестыцыі — на 3,1%, заробкі — на 3,4%, цэны — на 6%

29 ліпеня, Позірк. Урад плануе, што валавы ўнутраны прадукт па выніках 2027 года складзе каля 360 млрд рублёў, заявіў міністр эканомікі Юрый Чабатар на пасяджэнні прэзідыума Савета міністраў.

Як перадае прэс-служба Мінэканомікі, чыноўнік падкрэсліў, што параметры прагнозу-2027 вызначаны пад задачы праграмы пяцігодкі з улікам “бягучых і прагназаваных знешніх умоў, якія складаюцца”.

У прыватнасці, прагназуецца рост экспарту тавараў і паслуг на 2,9%, інвестыцый — на 3,1%, цэн — не больш як на 6%.

Чабатар заявіў пра новы падыход, які базуецца “на трох прынцыпах: будаваць хутчэй, уводзіць хутчэй магутнасці, атрымліваць эфект ад праектаў і вытворчасцей раней”.

“Адпаведна ставім тры задачы: хутчэй выйсці на заяўленыя магутнасці па ўжо рэалізаваных праектах, паскорыць завяршэнне інвестпраектаў, забяспечыць паскораны старт новых бізнес-ідэй. Усяго трэба будзе ажыццявіць рэалізацыю больш як 650 інвестыцыйных праектаў рэгіянальных і галіновых планаў на 2027 год”, — сказаў міністр.

Паводле яго слоў, асобы акцэнт у праграме зроблены на “больш дынамічным, амаль удвая большым за таварны, экспарце паслуг”. Асноўнымі драйверамі тут ён назваў ІТ-сферу, турызм, транспарт, адукацыю і медыцыну.

Кіраўнік Мінэканомікі лічыць, што рэалізацыя пералічаных праграм дазволіць “забяспечыць рост рэальных наяўных грашовых даходаў насельніцтва”.

“Плануецца, што сярэдні заробак па эканоміцы будзе з ростам +3,4% у рэальным выражэнні. Узрасце пакупніцкая здольнасць насельніцтва ва ўмовах запавольвання інфляцыі”, — рэзюмаваў чыноўнік.

Згодна з зацверджанымі Аляксандрам Лукашэнкам найважнейшымі эканамічнымі прагнознымі (дэ-факта — планавымі) параметрамі на 2026 год, валавы ўнутраны прадукт павінен павялічыцца на 2,8%, інвестыцыі за кошт усіх крыніц фінансавання — на 3,1%, экспарт тавараў і паслуг — на 3,7% (з пераважным нарошчваннем яго фізічных аб’ёмаў), рэальныя наяўныя грашовыя даходы насельніцтва — на 4,8%, інфляцыя — не больш як 7%, міжнародныя рэзервовыя актывы — не менш як 9,2 млрд долараў.

Паводле вынікаў 2020 года ВУП складаў 149 млрд 720,8 млн, 2021-га — 176 млрд 879 млн, 2022-га — 193 млрд 741 млн, 2023-га — 217 млрд 969 млн, 2024-га — 255 млрд 124,2 млн, 2025-га — 286 млрд 652,4 млн.