30 мігрантаў праніклі ў Літву з Беларусі праз падкоп на мяжы
10 красавіка, Позірк. Пра затрыманне ў Вільнюскім раёне на мяжы з Беларуссю групы мігрантаў паведаміла Служба аховы дзяржаўнай мяжы Літвы (САДМ).
Паводле звестак ведамства, увечары 6 красавіка сістэма відэаназірання заставы імя Юргіса Кібартаса Вільнюскага пагранатрада “зафіксавала нетыповае парушэнне дзяржаўнай мяжы”. “Было заўважана, як каля вёскі Баравікіне праз выкапаную пад зямлёй нару ўсяго за некалькі хвілін адзін за адным незаконна перасеклі дзяржаўную мяжу Літвы 30 чалавек”, — гаворыцца ў паведамленні.
Памежнікі неадкладна паведамілі аб тым, што здарылася, калегам з суседніх памежных застаў. У аператыўна распачатай аперацыі ўдзельнічалі сілы САДМ, супрацоўнікі паліцыі, кінолагі, быў узняты верталёт і беспілотныя лятальныя апараты.
Адзначаецца, што большая частка парушальнікаў была аператыўна затрыманая. Таксама затрымалі траіх замежнікаў, якія павінны былі перавозіць мігрантаў у Польшчу.
35-гадовы грамадзянін Украіны, які кіраваў мікрааўтобусам “Toyota Proace“, прызнаўся, што прыбыў забраць нелегальных мігрантаў, паведамляе САДМ. Тыя ж дзеянні планавалі 41-гадовы грамадзянін Грузіі на аўтамабілі “Opel Corsa“ і 24-гадовы ўкраінец на аўтамабілі “VW Passat“.
Паведамляецца, што тры аўтамабілі зарэгістраваныя ў Польшчы. З допытаў гэтых не знаёмых адзін з адным кіроўцаў і іх перапіскі ў мабільных прыкладаннях ўстаноўлена, што іх дзеянні каардынаваліся, яны атрымлівалі ўказанні па перавозцы мігрантаў.
8 красавіка быў таксама затрыманы 37-гадовы грамадзянін Літвы, які на аўтамабілі “VW Tiguan“ перавозіў шасцярых мігрантаў — грамадзян Афганістана.
У працяг “маштабнай аперацыі“, як адзначае САДМ, 8 красавіка ў Клайпедзе памежнікі затрымалі 44-гадовага грамадзяніна Азербайджана і 28-гадовага грамадзяніна Літвы, якія маюць дачыненне “не толькі да гэтых злачынстваў, але і падазраваных у арганізацыі іншых злачынстваў, звязаных з перавозкай людзей праз дзяржаўную мяжу”. Затрыманыя змешчаныя ў ізалятар. Распачатае дасудовае расследаванне. Падазраваным пагражае пазбаўленне волі на тэрмін ад двух да васьмі гадоў.
Да вечара 8 красавіка памежнікі затрымалі 27 з 30 асоб, якія незаконна перасеклі мяжу, 24 з іх вернутыя ў Беларусь, двое з-за праблем са здароўем дастаўленыя ў медыцынскія ўстановы, гаворыцца ў рэлізе пагранведамства. Замежнікі, якія нелегальна праніклі ў Літву, — грамадзяне Афганістана, Ірака і Пакістана. Толькі частка з іх мела дакументы, якія сведчаць асобу.
Вышук яшчэ траіх замежнікаў працягваецца.
Раней “Позірк” паведамляў, што апошнім часам Латвія і Літва адзначаюць рэзкае павелічэнне колькасці спробаў мігрантаў нелегальна перасекчы мяжу з боку Беларусі.
Латвійскія службы ў студзені актыўнасці на беларускім кірунку не назіралі, у лютым спынілі 20 спробаў, сакавіку — 295, а за шэсць красавіцкіх дзён — 245; літоўскія — 15, 25, 149 і 121 адпаведна.
Адметна, што спыненне міграцыйнага крызісу названае ўладамі Літвы адной з умоў пачатку дыялогу з Мінскам на ўзроўні намеснікаў міністраў замежных спраў. Такога дыялогу патрабуе ад Вільнюса рэжым Аляксандра Лукашэнкі. Пра неабходнасць двухбаковых кантактаў таксама заяўляў спецпасланнік прэзідэнта ЗША па Беларусі Джон Коўл.
З вясны 2021 года на мяжы Беларусі і краін ЕС працягваецца міграцыйны крызіс, які ўлады суседніх еўрапейскіх дзяржаў лічаць “гібрыднай атакай“, арганізаванай рэжымамі ў Мінску і Маскве.
Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, таму што тых туды нібыта “паклікалі”, а сам ЕС “душыць” Мінск санкцыямі.
