У Віцебскім раёне ў лабавым сутыкненні з фурай загінула вадзіцель легкавога аўто

7 лістапада, Позірк. Пра смяротнае ДТЗ на 17-м кіламетры аўтадарогі Р-115 Віцебск — Гарадок паведамляе ДАІ Віцебскай вобласці.

Аварыя адбылася ў Віцебскім раёне каля поўдня 6 лістапада. Кіроўца Audi 1956 года нараджэння выехала на паласу сустрэчнага руху, дзе здзейсніла сутыкненне з грузавіком Volvo, які рухаўся ў сустрэчным кірунку.

Яна памерла на месцы здарэння.

Як паведамлялася, 26 кастрычніка 54-гадовы вадзіцель аўтамабіля “Шэўрале” рухаўся па вул. Шашэйнай у в. Сіняўка (Мінская вобласць). Ён здзейсніў спадарожнае сутыкненне з аўтамабілем “Фольксваген”, які рухаўся наперадзе, пад кіраваннем 30-гадовай жанчыны.

У выніку сутыкнення “Шэўрале” выехаў на паласу сустрэчнага руху, дзе сутыкнуўся з грузавіком МАЗ. Вадзіцель Chevrolet ад атрыманых цялесных пашкоджанняў памёр на месцы здарэння. Яго пасажыры — 37-гадовая жанчына і 6-гадовая дзяўчынка — шпіталізаваны.

У 2025 годзе колькасць дарожна-транспартных здарэнняў у Беларусі знізілася на 5,5% (з 3.453 да 3.262), вынікае з праведзенага “Позіркам” аналізу звестак Нацыянальнага статыстычнага камітэта. Колькасць загінулых у ДТЗ скарацілася на 1,8 працэнта (з 434 да 426), траўмаваных — на 8,4% (з 3.804 да 3.483).