38-гадовы рабочы загінуў у Наваполацку — другі выпадак смяротнага траўматызму на вытворчасці за тры дні

7 лістапада, Позірк. 38-гадовы фармоўшчык загінуў 5 лістапада на тэрыторыі прадпрыемства ў Наваполацку (Віцебская вобласць), паведамляе Следчы камітэт.

Па папярэдніх дадзеных, мужчына выконваў свае абавязкі, а “пасля завяршэння асноўнай працы вырашыў ліквідаваць няспраўнасць металічных варот цэха, якія працяглы час не выкарыстоўваліся”.

Вароты перакуліліся і прыціснулі мужчыну. Ад атрыманых траўм ён памёр.

Увечары 3 лістапада на тэрыторыі піларамы ў Магілёўскай вобласці загінуў 28-гадовы вадзіцель самазвала Shacman. Паводле даных СК, падчас разгрузкі бутавага каменя кузаў грузавіка закрануў высакавольтную лінію электраперадачы, пасля чаго машына загарэлася. Папярэдне, вадзіцель загінуў ад паражэння электрычным токам, спрабуючы выбрацца з кабіны.

У абодвух выпадках на месцы здарэння працавала следча-аператыўная група. Следчыя агледзелі месца здарэння, апыталі відавочцаў, канфіскавалі дакументацыю па ахове працы і тэхніцы бяспекі. Прызначана судова-медыцынская экспертыза.

20 кастрычніка 2026 года на малочнатаварнай ферме “Гардуны” ў Добрушскім раёне (Гомельская вобласць) загінуў 55-гадовы жывёлавод. Ён падмяняў слесара і чысціў гаспадарчае памяшканне ад адыходаў жыццядзейнасці жывёл. Мужчына ўпаў на рухомыя элементы сістэмы гноювыдалення -—шасцярні і ланцугі канвеера — і атрымаў смяротныя траўмы.

14 кастрычніка 2026 года на тэрыторыі аднаго з прадпрыемстваў Магілёва загінуў 57-гадовы слесар-рамонтнік. Разам з калегам ён вымяраў узровень паліва ў цыстэрнах па даручэнні майстра цэха. Калі калега адышоў за абсталяваннем, мужчына застаўся каля цыстэрны. Яго знайшлі без прытомнасці побач з усходамі. Паводле даных СК, ён упаў з вышыні каля трох метраў.

8 кастрычніка 2026 года на прадпрыемстве ў Брэсцкім раёне загінуў 17-гадовы дапаможны працоўны, які працаваў па дамове падраду. Падчас выпрабавання вентыляцыйнай усталёўкі яго зацягнула ўнутр абсталяванні струменем паветра. СК узбудзіў крымінальныя справы ў дачыненні да адказных асоб па артыкулах аб парушэнні правілаў аховы працы, якое прывяло да смерці чалавека, і прычыненні смерці па неасцярожнасці.

У 2025 годзе ў Беларусі на вытворчасці загінула 103 чалавекі — гэта гістарычны мінімум, паводле звестак Міністэрства працы і сацыяльнай абароны. За апошнія 20 гадоў вытворчы траўматызм скараціўся ўтрая, а смяротны — удвая, паведаміў у красавіку 2026-га намеснік міністра працы Алег Такун.