ТРВОД адшукала відавочцу, які выцягнуў з Бярэзіны жанчыну, якая скокнула з моста

6 лістапада, Позірк. Аб ушанаванні мужчыны, які 30 кастрычніка дапамог выратаваць жанчыну, якая танула ў Барысаве (Мінская вобласць), паведаміла Рэспубліканскае таварыства ратавання на водах (ТРВОД).

У той дзень жанчына скокнула ў раку Бярэзіну з пешаходнага моста. Выратавальніка, які, як паведамлялася, “выбраўся на бераг і сышоў з месца здарэння, не чакаючы падзякі”, знайшлі з дапамогай сацыяльных сетак і ўзнагародзілі ў мясцовым аддзяленні ТРВОД 5 лістапада.

Рэгіянальнае дзяржвыданне “Адзінства” паведаміла, што 30 кастрычніка Яўген Афанасьеў “накіраваўся на пляж, каб адпачыць і палюбавацца прыродай. Самога моманту падзення жанчыны ў ваду ён не бачыў: бераг у гэтым месцы зарос расліннасцю, таму тое, што адбываецца заставалася па-за полем яго зроку“.

Адзначаецца, што “спачатку мужчына пачуў гук падзення, а затым — голас і крыкі аб дапамозе. Стала зразумела, што ў вадзе знаходзіцца чалавек, якому патрэбна дапамога”.

“У той момант не было калі думаць, ацэньваць рызыкі: я проста распрануўся і палез ратаваць. Ты альбо будзеш стаяць і глядзець на тое, што адбываецца, альбо будзеш удзельнічаць. Я выбраў другое”, — цытуе выданне выратавальніка.

Ён таксама паведаміў, што “хавацца не збіраўся, проста адправіўся далей па сваіх справах”.

З 2026 года ТРВОД узнагароджвае людзей, якія выратавалі тануўшых, знакам “За выратаванне на вадзе“. Першым уладальнікам такога знака стаў 32-гадовы жыхар Жлобіна (Гомельская вобласць) Канстанцін Пракапенка, які гэтым летам выратаваў двух братоў васьмі і шасці гадоў, якія танулі ў Дняпры. Аднаму з хлопчыкаў, які ўжо не падаваў прыкмет жыцця, ён надаў першую дапамогу. Дзеці выжылі.

Як паведамлялася раней, за купальны сезон (з траўня па верасень) быў выратаваны 181 чалавек, з іх 147 — работнікамі ТРВОД. Сярод выратаваных 62 непаўналетніх. За аналагічны перыяд 2025 года было выратавана 115 чалавек, у тым ліку 35 непаўналетніх.

Патанула 145 чалавек, што на пяць, або 3%, менш, чым летась. Больш за ўсё людзей загінула пры падзенні ў ваду — 57; падчас купання — 51, рыбнай лоўлі з берага — 20, з лодкі — 6, пры эксплуатацыі плавальных сродкаў — 5. Яшчэ 6 чалавек загінула “пры іншых абставінах”.