12 верасня, Позірк. Беларускі дэмакратычны лідар Святлана Ціханоўская папрасіла прадстаўнікоў Злучаных Штатаў Амерыкі даведацца пра лёс лідара “Народнай Грамады” Мікалая Статкевіча — напярэдадні вызваленага палітвязня, які адмовіўся пакідаць Беларусь.
“На цяперашні момант месцазнаходжанне Мікалая Статкевіча невядома, — сказала яна на прэс-канферэнцыі 12 верасня ў Вільнюсе. — Вядома, мы звярнуліся да нашых амерыканскіх партнёраў з просьбай высветліць гэтую сітуацыю. <…> Але гэтая справа не пары гадзін. Мы разумеем, што ў Амерыцы была ноч, што людзі толькі паляцелі — сёння раніцай, я маю на ўвазе нашыя амерыканцы. Таму трэба крыху часу, каб даведацца, што адбываецца з Мікалаем. Вядома, ягоны лёс вельмі хвалюе”.
11 верасня пасля сустрэчы намесніка спецпасланніка прэзідэнта ЗША па Украіне Джона Коўла з Аляксандрам Лукашэнкам у Мінску, стала вядома, што “па просьбе прэзідэнта ЗША і іншых кіраўнікоў дзяржаў” той прыняў рашэнне аб памілаванні “шэрагу замежных грамадзян, асуджаных за шпіёнскую дзейнасць, удзел у экстрэмісцкай і тэрарыстычнай дзейнасці і здзяйсненне іншых злачынных дзеянняў на тэрыторыі Рэспублікі Беларусь”.
Усяго памілавана 52 чалавекі, сярод якіх 14 замежных грамадзян: шэсць — Літвы, па двое — Латвіі, Польшчы і Германіі, адзін грамадзянін Францыі і адзін — Вялікабрытаніі, дзевяць журналістаў, а таксама палітыкі, актывісты, грамадскія дзеячы.
Як мінімум адзін з іх — Мікалай Статкевіч — адмовіўся з’язджаць у Літву (дэпартацыя была ўмовай угоды Лукашэнкі з амерыканцамі). Некалькі гадзін ён правёў паміж пунктамі пропуску Каменны Лог і Мядзінінкай, пасля чаго пайшоў на беларускі бок. Пакуль яго лёс невядомы.
Аўтарызавацца
Забыліся пароль?
Выхад з профілю
