5 января, Позірк. Міністэрства інфармацыі ўнесла ў рэспубліканскі спіс “экстрэмісцкіх
матэрыялаў” сайт незалежнага выдання “Новы Час” і яго старонкі ў сацыяльных сетках.
Як вынікае з інфармацыі на сайце ведамства, адпаведнае рашэнне прыняў 22 снежня суд Цэнтральнага раёна Мінска.
“Экстрэмісцкімі матэрыяламі” прызнаны кантэнт выдання ў “Фэйсбуку”, “ЦікТоку”, “Інстаграме”, “ВКонтакте”, “Х”, а таксама канал на платформе YouTube.
Тэлеграм-канал “Новага Часу” быў уключаны ў “экстрэмісцкі” спіс Мінінфарму 19 студзеня 2023 года судом Ленінскага раёна Мінска.
Грамадска-палітычная газета “Новы Час”, якая выдавалася з 2002 года, не выходзіць у друкаванай версіі са жніўня 2021 года. Сайт novychas.by быў заблакаваны ў Беларусі ў кастрычніку таго ж года. Працуе сайт-люстэрка novychas.online.
Пасля прэзідэнцкіх выбараў 2020 года беларускія ўлады распачалі кампанію па ліквідацыі і крыміналізацыі незалежных СМІ, якая працягваецца дагэтуль. Магчымасці працаваць у нацыянальнай юрысдыкцыі былі пазбаўленыя дзясяткі рэспубліканскіх і рэгіянальных медыя. Многія з іх цяпер працуюць у эміграцыі.
Паводле звестак Беларускай асацыяцыі журналістаў, у зняволенні на сёння застаецца 32 прадстаўніка СМІ.
