Лябедзька спадзяецца на стварэнне ў Сейме Латвіі да канца года групы “За дэмакратычную Беларусь“

Апублікавана на адкрытай версіі “Позірку” 5 лістапада 2026 года ў 21:50

4 лістапада, Позірк. Надзею на стварэнне да канца 2026 года ў Сейме Латвіі групы “За дэмакратычную Беларусь“ выказаў дарадца Святланы Ціханоўскай па канстытуцыйнай рэформе і міжпарламенцкім супрацоўніцтве Анатоль Лябедзька.

Каментуючы “Позірку“ рашэнне латвійскага парламента адмовіцца ад стварэння груп супрацоўніцтва з парламентамі Беларусі і Расіі, ён адзначыў, што Сейм “не хоча сябраваць з лукашэнкаўскай Беларуссю”. “І гэта заканамерна, калі ўзяць да ўвагі, што беларускі рэжым з’яўляецца суагрэсарам разам з [Уладзімірам] Пуціным, а таксама тое, што цяпер адбываецца на беларуска-латвійскай мяжы (міграцыйны крызіс. — “Позірк“.)”, — заявіў суразмоўца.

Пры гэтым, падкрэсліў палітык, рашэнне не азначае адмовы ад кантактаў з дэмсіламі.

Паводле яго слоў, аналагічнае рашэнне латвійскія дэпутаты прымалі і ў папярэднім скліканні, адмовіўшыся ад традыцыйных груп супрацоўніцтва з парламентамі Беларусі і РФ і арганізаваўшы групу са згаданай назвай.

“Цяпер мы знаходзімся ў працэсе камунікацыі [для] стварэння такой групы [у парламенце новага склікання]”, — паведаміў дарадца Ціханоўскай.

Лейла Расіма, якая ўзначальвала фармацыю ў папярэднім скліканні, не прайшла ў новы склад парламента, аднак дэпутацкія мандаты атрымалі некалькі яе ўдзельнікаў, удакладніў палітык.

Як паведаміла 3 лістапада прэс-служба Сейма Латвіі, дэпутаты прынялі рашэнне не ствараць у цяперашнім скліканні групы супрацоўніцтва з парламентамі Беларусі і Расіі.

У рашэнні падкрэсліваецца, што супрацоўніцтва з парламентамі Расійскай Федэрацыі і Рэспублікі Беларусь недапушчальна, паколькі вялікая колькасць дэпутатаў Дзяржаўнай Думы і Нацыянальнага сходу Беларусі ўключана ў санкцыйныя спісы Еўрапейскага саюза і ЗША за падтрымку анэксіі Крыма, акупацыі і анэксіі ўкраінскіх тэрыторый, а таксама за рэпрэсіі, парушэнні правоў чалавека і падтрымку ўдзелу беларускага рэжыму ў вайне Расіі супраць Украіны.

У дакуменце адзначаецца, што Беларусь парушыла міжнародныя абавязацельствы, дазволіўшы выкарыстоўваць сваю тэрыторыю для агрэсіі супраць Украіны. Сейм лічыць парламенцкае супрацоўніцтва з Беларуссю несумяшчальным з міжнародным правам і дэмакратычнымі каштоўнасцямі да спынення адпаведных парушэнняў і поўнага пакрыцця Украіне нанесенай шкоды.

Цяперашнее, 15-е скліканне Сейма Латвіі прыступіла да працы 3 лістапада 2026 года.