Швейцарыя далучылася да апошняга пакета санкцый ЕС у дачыненні да Беларусі

5 лістапада, Позірк. Аб далучэнні да дадатковых санкцый Еўрасаюза супраць Беларусі паведаміў Федэральны савет Швейцарыі.

Рашэнне прынятае 4 лістапада. Гаворка ідзе пра абмежаванні, якія ЕС увёў 23 ліпеня 2026 года адначасова з 21-м пакетам санкцый супраць Расіі, куды былі ўключаныя рэстрыкцыі ў дачыненні да Беларусі.

Падставай для дадатковых мер у дачыненні да Мінска названая “ўцягнутасць Беларусі ў вайну Расіі супраць Украіны, якая доўжыцца”.

Змены ў швейцарскія санкцыйныя спісы пачалі дзейнічаць 4 лістапада ў 23:00 (5 лістапада ў 1:00 паводле беларускага часу), сектаральныя абмежаванні — 5 лістапада (час не ўказаны).

Адначасова Швейцарыя далучылася да згаданых абмежаванняў ЕС супраць Расіі.

Як паведамляў “Позірк”, 23 ліпеня Савет ЕС увёў санкцыі супраць Мазырскага НПЗ і зарэгістраванай у Смаленску Еўрапейскай трэйдынгавай кампаніі — даччынай структуры Беларускай нафтавай кампаніі, якая прадае прадукцыю беларускіх нафтаперапрацоўчых заводаў.

У пералік арганізацый, пастаўкі тэхналогій якім абмежаваныя, уключаныя “ЧІП і ДІП”, Рагачоўскі завод “Дыяпраектар”, канструктарскае бюро “Дысплей” і “Завод корпусных вырабаў”.

Была пашыраная забарона на экспарт у Беларусь тавараў для ваеннай, абароннай і аэракасмічнай галін, у тым ліку асобных металаў і абсталявання для беспілотнікаў. Адначасова прадугледжаныя выключэнні для паставак абсталявання грамадзянскім сеткам электроннай сувязі, якія не кантралююцца беларускай дзяржавай больш чым на 50%.

Уведзеныя абмежаванні на імпарт з Беларусі шэрагу руд і металаў, хімічнай прадукцыі, вырабаў са шкла і аўтазапчастак.

Забарона для грамадзян і рэзідэнтаў Беларусі валодаць, кантраляваць або кіраваць кампаніямі ЕС, якія надаюць паслугі крыптагаманцоў, рахункаў і захоўвання, распаўсюджаная на астатнія паслугі ў сферы крыптаактываў. Абмежаванне не датычыцца асоб, якія маюць грамадзянства або часовы ці пастаянны від на жыхарства ў краінах ЕС, Еўрапейскай эканамічнай зоны або Швейцарыі.