Беларусь адмовілася экстрадаваць літоўскага блогера Кандротаса

5 лістапада, Позірк. Генеральная пракуратура Беларусі адмовілася выдаць Літве блогера і актывіста Антанаса Кандротаса, паведаміла 5 лістапада прэс-служба Міністэрства юстыцыі гэтай балтыйскай краіны.

Пра рашэнне беларускага боку літоўскі Мінюст праінфармаваў Каўнаскі акруговы суд, які хадайнічаў пра экстрадыцыю.

У жніўні ведамства, атрымаўшы запыт Каўнаскага акруговага суда, ініцыявала працэс экстрадыцыі Кандротаса і афіцыйна звярнулася ў Генпракуратуру Беларусі наконт яго выдачы Літве.

“Літва імкнецца да таго, каб А. Кандротас адбыў прызначанае яму пакаранне ў выглядзе пазбаўлення волі, у сувязі з чым былі зробленыя ўсе захады. Выдадзены еўрапейскі ордар на арышт дае магчымасць затрымаць асобу, як толькі яна апынецца на тэрыторыі ЕС або яго партнёраў”, — заявіў намеснік міністра юстыцыі Марцінас Дабравольскіс.

Каўнаскі акруговы суд выдаў еўрапейскі ордар на арышт блогера 29 чэрвеня 2026 года.

У чэрвені Апеляцыйны суд Літвы прыгаварыў Кандротаса да 3,5 года пазбаўлення волі па справе аб фінансавых злачынствах. Вырак набыў моц, аднак не можа быць выкананы, пакуль актывіст знаходзіцца па-за межамі краіны.

Актывіст знаходзіўся пад падпіскай аб нявыездзе ў рамках справы аб парушэнні грамадскага парадку (абвінавачваецца ў тым, што ўдарыў грамадскага дзеяча падчас акцыі пратэсту), аднак на пачатку траўня ён сам паведаміў, што знаходзіцца ў Беларусі. Пасля прыбыцця мужчына даў інтэрв’ю беларускім прапагандыстам — раскрытыкаваў літоўскія ўлады, заявіў пра фіктыўны характар прэтэнзій, якія ляглі ў аснову крымінальнага пераследу.

У верасні 2025 года быў абвешчаны вырак, у адпаведнасці з якім Кандротас асуджаны на 4 гады зняволення па “справе аб беспарадках ля Сейма” ў 2021-м, а ў сакавіку 2026-га — на 1 год пазбаўлення волі па “справе аб распальванні нянавісці да былога члена Сейма і парушэнні грамадскага парадку”. Абодва гэтыя рашэнні абскарджаныя ў апеляцыйным парадку і не набылі моц.