Кіраўніцтва мінскай кампаніі па здачы нерухомасці ў арэнду абвінавачваецца ў нявыплаце падаткаў за кошт драблення бізнесу
5 лістапада, Позірк. У суд накіраваная справа заснавальніка і кіраўніка сталічнай арганізацыі, што займаецца здачай нерухомасці ў арэнду, які абвінавачваецца ва ўхіленні ад выплаты падаткаў у асабліва буйным памеры, паведамляе прэс-служба Генеральнай пракуратуры.
Згодна з матэрыяламі справы, кіраўнік і бухгалтар кампаніі ў 2019–2025 гадах штучна рэарганізавалі бізнес шляхам вылучэння і зліцця новых суб’ектаў гаспадарання. Гэтым суб’ектам “у парушэнне эканамічнага сэнсу” былі перададзеныя актывы і пасівы кампаніі, у тым ліку аб’екты нерухомай маёмасці.
“У прыватнасці, яны ўкаранілі схему драблення і падзелу бізнесу для атрымання неабгрунтаваных пераваг пры выкарыстанні спрошчанай сістэмы падаткаабкладання, — гаворыцца ў паведамленні. — Супрацьпраўнымі дзеяннямі прычыненая шкода на суму больш за 5 млн рублёў, якую абвінавачаныя ў поўным аб’ёме добраахвотна кампенсавалі. Апрача шкоды іх дзеянні пацягнулі налічэнне пені па падатках на 3 млн рублёў”.
Крымінальную справу вяло галоўнае следчае ўпраўленне цэнтральнага апарату Следчага камітэта.
У жніўні 2026 года стала вядома пра завяршэнне расследавання справы прадстаўнікоў будаўнічай арганізацыі, абвінавачаных ва ўхіленні ад выплаты падаткаў у асабліва буйным памеры і злоўжыванні службовымі паўнамоцтвамі. Паводле інфармацыі СК, фактычныя ўладальнікі і службовыя асобы кампаніі выкарыстоўвалі схемы драблення бізнесу ды іншыя механізмы ўтойвання рэальных фінансавых паказчыкаў. Фігуранты добраахвотна выплацілі больш за 31,2 млн рублёў маёмасных спагнанняў.
У чэрвені 2026 года Генпракуратура накіравала ў суд справу фактычнага кіраўніка камерцыйных арганізацый і дзесяці яго меркаваных саўдзельнікаў. Паводле версіі следства, з 2021 года па лістапад 2024-га яны выкарыстоўвалі 15 падкантрольных кампаній для працы ў сферы пасажырскіх перавозак і ўхілення ад выплаты падаткаў і ўнёскаў у Фонд сацыяльнай абароны насельніцтва. Арганізацыі афармлялі на падстаўных асоб, а пасля спынялі іх дзейнасць пасля рэарганізацый.
У жніўні 2026 года Камітэт дзяржаўнага кантролю паведаміў пра выяўленне схемы ўхілення ад выплаты падаткаў у сетцы стаматалагічных клінік Гомеля. Паводле версіі ведамства, уладальнік штучна падзяліў дзейнасць паміж дзвюма падкантрольнымі арганізацыямі, адна з якіх прымяняла спрошчаную сістэму падаткаабкладання. Агульная сума нявыплачаных падаткаў перавысіла 3,3 млн рублёў.
