Вайскоўцы Латвіі заявілі пра дрон, які заляцеў з Беларусі, а пасля накіраваўся ў РФ

2 лістапада, Позірк. Увечары 1 лістапада беларуска-латвійскую мяжу перасёк беспілотнік, паведамляе LSM са спасылкай на прадстаўніка Нацыянальных узброеных сіл (НУС) Латвіі Селдзіса Грасманіса.

“У 19 гадзін [цэль] перасекла беларуска-латвійскую мяжу і заляцела ў Краслаўскі край, — заявіў ён. — Цэль суправаджалі і назіралі за ёй. Пасля ў 19:16 цэль перасекла латвійска-расійскую мяжу ў Лудзенскім краі і вылецела за межы краіны. <…> Што гэта быў за дрон? Гэтага мы сказаць не можам. Можам выказаць здагадку, што гэта быў украінскі дрон. Гэта толькі здагадкі”.

У сувязі з пагрозай у паветранай прасторы ў Краслаўскім і Лудзенскім краях у 18:59 было абвешчана “папярэджанне аранжавага ўзроўню”. Жыхароў заклікалі схавацца ў памяшканнях і знаходзіцца там, дзе ад вонкавага боку будынка іх аддзяляюць як мінімум дзве сцяны. Папярэджанне было скасаванае ў 19:30.

Паводле інфармацыі НУС, для нейтралізацыі пагрозы быў задзейнічаны дрон-перахопнік Blaze. У 19:19 ля латвійска-расійскай мяжы вайскоўцы актывавалі механізм яго самазнішчэння.

Міністр абароны Латвіі Райвіс Мелніс патлумачыў, што перахопнік суправаджаў беспілотнік, які рухаўся ўздоўж мяжы з Расіяй, а пасля пакінуў латвійскую тэрыторыю. Далей было прынятае рашэнне знішчыць уласны апарат, каб той не заляцеў у суседнюю краіну.

НУС адзначылі, што сумесна з саюзнікамі па НАТО пастаянна кантралююць паветраную прастору. На ўсходнюю мяжу накіраваныя дадатковыя падраздзяленні для ўзмацнення супрацьпаветранай абароны.

17 жніўня Мелніс заявіў, што збіты трыма днямі раней беспілотнік заляцеў на тэрыторыю краіны з Беларусі.

14 жніўня знішчальнікі місіі НАТО па патруляванні паветранай прасторы краін Балтыі ў Балвскім краі збілі замежны дрон. Нацыянальныя ўзброеныя сілы паведамлялі, што ён заляцеў у латвійскую паветраную прастору “ў выніку прымянення Расіяй сродкаў РЭБ”.

У падобных сітуацыях беспілотнікі працягнуць збіваць, бо “гаворка ідзе пра бяспеку жыхароў і іх маёмасці”, дадаў тады Мелніс: “Рызыка прылёту дронаў захоўваецца”.

Са студзеня 2025 года па травень 2026 года ў краінах Балтыі як мінімум 24 разы паведамлялі пра беспілотнікі, якія з’яўляліся ў паветранай прасторы або былі знойдзеныя на тэрыторыі, пісала “Новая газета Еўропа”, прааналізаваўшы паведамленні мясцовых уладаў.

Часцей за ўсё пра такія выпадкі паведамлялі ў Латвіі (не менш за 12 эпізодаў). Яшчэ як мінімум сем выпадкаў зафіксавана ў Літве, пяць — у Эстоніі.

У шэрагу выпадкаў паходжанне беспілотнікаў вызначыць не атрымалася, аднак частку дронаў называлі расійскімі, украінскімі або тымі, што прыляцелі з боку Беларусі. Некаторыя інцыдэнты прыводзілі да абмежаванняў у працы інфраструктуры краін Балтыі.

Уначы 15 верасня ў Літве абвяшчалася паветраная трывога праз аб’ект, які заляцеў з боку Беларусі. Тады з авіябазы ў Шаўляі былі паднятыя італьянскія знішчальнікі НАТО, якія збілі аб’ект — беспілотнік. Абломкі дрона былі знойдзеныя ля вёскі Праткунай у Кайшадорскім раёне. Гэта быў першы выпадак знішчэння такога аб’екта над Літвой.

Пазней літоўскі міністр абароны Робертас Каўнас паведаміў, што ў дроне была знойдзеная выбуховая прылада, сапёры яе абясшкодзілі.

Мінск не папярэдзіў Вільнюс пра дрон, заявіў 15 верасня галоўны дарадца літоўскага прэзідэнта па пытаннях нацыянальнай бяспекі Дэйвідас Матулёніс.

16 верасня прэзідэнт Літвы Гітанас Наўседа пасля пасяджэння Дзяржаўнай рады абароны паведаміў, што беспілотнік “быў дронам тыпу “Гербера””: “Хутчэй за ўсё, гэта не было наўмысным дзеяннем супраць Літвы, <…> гэта быў расійскі дрон, прызначаны для Украіны, які быў адхілены ад курсу ўкраінскімі сродкамі радыёэлектроннай барацьбы і апынуўся на тэрыторыі нашай краіны, дзе і быў збіты”.

У той жа дзень МЗС Літвы ўручыла прадстаўніку амбасады Беларусі “ноту рашучага пратэсту” ў сувязі з парушэннем дзяржаўнай мяжы і паветранай прасторы краіны.

Афіцыйны Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.