ЕАБР: У Беларусі захаванне росту даходаў стварае ўмовы для далейшага пашырэння спажывецкай актыўнасці

2 лістапада, Позірк. У Беларусі захаванне росту рэальных даходаў стварае ўмовы для далейшага пашырэння спажывецкай актыўнасці, гаворыцца ў штотыднёвым макрааглядзе Еўразійскага банка развіцця.

“Рост рэальных заробкаў працягвае падтрымліваць спажывецкі попыт у Беларусі, — адзначылі эксперты. — У верасні рэальны заробак павялічыўся ў гадавым вымярэнні на 7,4% пасля 8,1% у жніўні”.

На думку аналітыкаў, працадаўцы “па-ранейшаму падвышалі памер аплаты працы праз недахоп персаналу”. Пры гэтым звяртаецца ўвага на тое, што ўзровень беспрацоўя знізіўся з 2,1% у другім квартале 2026 года да 1,9% у трэцім квартале, “абнавіўшы гістарычны мінімум”.

“Дадатковую падтрымку даходам работнікаў бюджэтнага сектара”, як адзначаецца, учыніла падвышэнне базавай стаўкі аплаты працы з верасня. “Гэта дазволіла захаваць апераджальны рост у бюджэтнай сферы (+8,3% у гадавым вымярэнні) у параўнанні з сярэднім па эканоміцы”, — рэзюмаваў ЕАБР.

Раней “Позірк” паведамляў, што рост рэальных заробкаў у верасні зафіксаваны ва ўсіх рэгіёнах і сталіцы: у Віцебскай вобласці — на 9,7%, Гродзенскай і Брэсцкай — на 9,1%, Мінскай — на 8,4%, Магілёўскай — на 8,1%, Гомельскай — на 6,8%, Мінску — на 5,7%.

Разам з тым у студзені — верасні 2026 года ВУП Беларусі павялічыўся на 2% у параўнанні з тым жа перыядам мінулага года. У наяўных цэнах ён склаў 237 млрд рублёў.

Сітуацыя ў рэгіёнах: Мінск — рост ВРП да студзеня — верасня 2025-га на 1,9% (месяц таму рост у гадавым вымярэнні складаў 1,6%), Мінская вобласць — +2,5% (+2,6%), Брэсцкая — +3,4% (+3,4%), Гомельская — +1,3% (+1,6%), Гродзенская — +1,1% (+0,9%), Магілёўская — +1% (+0,9%), Віцебская — +0,3% (+0,3%).

У студзені эканоміка скарацілася на 1,2% да студзеня 2025-га (23,3 млрд рублёў), у студзені — лютым — на 1,2% да таго ж перыяду мінулага года (43,9 млрд), студзені — сакавіку — на 0,4% (68,2 млрд), студзені — красавіку — вырасла на 0,2% (94,5 млрд), студзені — траўні — на 0,9% (118,6 млрд), студзені — чэрвені — на 1,5% (149,6 млрд), студзені — ліпені — на 2,1% (180,5 млрд), студзені — жніўні — на 1,9% (209,1 млрд).

Згодна з найважнейшымі эканамічнымі прагнознымі (дэ-факта планавымі) параметрамі на 2026 год, валавы ўнутраны прадукт мае павялічыцца на 2,8%.