Замежнік з падробленым пашпартам РФ спрабаваў вылецець з Мінска ў Ерэван

13 кастрычніка, Позірк. Замежны грамадзянін быў затрыманы ў Нацыянальным аэрапорце Мінск 7 кастрычніка, паведаміла 13 кастрычніка прэс-служба Дзяржаўнага пагранічнага камітэта.

Паводле інфармацыі ведамства, мужчына пры афармленні рэйса ў Ерэван перадаў памежнікам унутраны пашпарт грамадзяніна Расіі, аднак дакумент выклікаў у іх падазрэнні. Адмысловая праверка паказала, што пашпарт часткова падроблены — у ім была замененая фотавыява ўладальніка.

Замежнік быў затрыманы і змешчаны ў ізалятар часовага ўтрымання ГУУС Мінгарвыканкама да высвятлення асобы, вядзецца разбіральніцтва.

У дачыненні да мужчыны распачаты адміністрацыйны працэс за спробу незаконнага перасячэння мяжы. Апрача штрафу — да 100 базавых велічынь (4,5 тыс. рублёў) — затрыманаму пагражае крымінальная адказнасць за выкарыстанне падробленага дакумента (арт. 80 КК — “падробка, выраб, выкарыстанне альбо збыт падробленых дакументаў, штампаў, пячатак, бланкаў”).

У ліпені Дзяржпагранкамітэт паведамляў, што ад пачатку 2026 года беларускія памежнікі выявілі больш за 340 “праблемных дакументаў”.