Лукашэнка спадзяецца пераадолець “штучна створаную негатыўную кан’юнктуру” ў адносінах з Іспаніяй

12 кастрычніка, Позірк. “Паважлівае стаўленне адзін да аднаго” і “падабенства традыцыйных каштоўнасцяў” дапамогуць Мінску і Мадрыду “пераадолець штучна створаную негатыўную палітычную кан’юнктуру”, заявіў Аляксандр Лукашэнка, віншуючы 12 кастрычніка народ Іспаніі з Днём іспанскай нацыі.

У пасланні, тэкст якога прыводзіць прэс-служба віншавальніка, адзначаны “пазітыўны досвед узаемадзеяння паміж краінамі на працягу больш чым 30 гадоў дыпламатычных адносін”.

Лукашэнка выказаў упэўненасць, што гэта паслужыць “асновай для падтрымкі і пашырэння шматлікіх сяброўскіх, сямейных і дзелавых кантактаў беларусаў і іспанцаў”.

У леташнім аналагічным пасланні яго аўтар запэўніваў, што “імкненне да мірнага і ўзаемавыгаднага супрацоўніцтва, канструктыўнага дыялогу і дружалюбных адносін цалкам адпавядае шчырым інтарэсам беларусаў і іспанцаў і застаецца падмуркам двухбаковых кантактаў, нягледзячы на складаныя геапалітычныя тэндэнцыі апошніх гадоў”.

Іспанія, будучы часткай Еўрапейскага саюза, не прызнае Лукашэнку легітымным прэзідэнтам Беларусі. Еўрасаюз увёў у дачыненні да прадстаўнікоў яго рэжыму санкцыі.

У сваю чаргу ўрад Беларусі ўвесну 2023 года зацвердзіў пералік “замежных дзяржаў, якія здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб”, у які ўваходзяць усе краіны ЕС.

Дэмакратычны лідар Святлана Ціханоўская неаднаразова наведвала Іспанію. Апошні раз — 1–3 кастрычніка.