Амаль па ўсёй Беларусі наведванне лясоў абмежаванае, у пяці раёнах на паўднёвым усходзе — забароненае

3 кастрычніка, Позірк. У 109 з 118 раёнаў Беларусі абмежавана наведванне лясоў, сведчыць інтэрактыўная мапа на сайце Міністэрства лясной гаспадаркі.

Абмежаванні, пры якіх у лясы нельга заязджаць на аўтамабілі і разводзіць там вогнішчы, але даступныя шпацыры, збор ягад ды грыбоў, дзейнічаюць на ўсёй тэрыторыі Брэсцкай, Гродзенскай і Магілёўскай абласцей і практычна паўсюдна ў Віцебскай, Мінскай і Гомельскай абласцях.

Поўная забарона на наведванне лясоў уведзеная на паўднёвым усходзе краіны — у Гомельскім, Добрушскім, Ельскім, Кармянскім і Чачэрскім раёнах Гомельскай вобласці.

У той жа час свабодна наведваць лясы можна ў паўночна-заходняй частцы краіны — у Мядзельскім раёне Мінскай вобласці, а таксама Браслаўскім, Верхнядзвінскім і Расонскім раёнах Віцебскай вобласці.