Палітвязнямі прызнана 12 чалавек, у тым ліку грамадзянін Чэхіі

2 кастрычніка, Позірк. Беларуская праваабарончая супольнасць 2 кастрычніка прызнала палітвязнямі яшчэ 12 чалавек, вынікае з сумеснай заявы, апублікаванай на сайце цэнтра “Вясна”. Цяпер у адпаведным спісе 888 чалавек.

Гэта пазбаўленныя волі паводле арт. 367 Дзмітрый Рудакоў, паводле арт. 342 і 293 Арцём Меркель і Анатоль Міндзіяраў. Статус атрымалі змешчаныя пад варту альбо ўжо асуджаныя да пакарання, звязанага з пазбаўленнем волі, за ўзаемадзеянне з “экстрэмісцкімі фармаваннямі” і ажыццяўленнем свабоды выказвання меркаванняў Максім Сяменчанка (361⁴), Жанна Яскулд (361, 361⁴), Віталь Дзямідчык (361), Павел Бажко (368, 361⁴), Андрэй Аўсяннікаў (361⁴), Ілья Галыгін (341, 361¹, 361⁴), Віталь Галавач (361⁴), Яўген Дзяруноў (361⁴) і Андрэя Цішкова (361⁴).

Паводле даных праваабаронцаў, Дзямідчык мае грамадзянства Чэхіі, дзе пастаянна пражываў з 2006 года. Ён ураджэнец Гродна (нарадзіўся ў 1974 годзе), беларускае грамадзянства таксама захавана.

Палітзняволены быў затрыманы 30 чэрвеня 2026-га пасля таго, як прыехаў на радзіму наведаць хворую маці. Падставай для крымінальнага пераследу сталі ахвяраванні на падтрымку дэмсіл.

Утрымліваецца пад вартай у мінскім СІЗА № 1 у чаканні суда. 

Праваабаронцы патрабуюць неадкладна вызваліць палітвязняў і прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў.

Акрамя “Вясны” дакумент падпісалі Lawtrend, “Прававая ініцыятыва”, Беларускі Хельсінкскі камітэт, Беларускі дом правоў чалавека імя Барыса Звозскава і Human Constanta.

Даведка “Позірку”:

арт. 293 УК — масавыя беспарадкі;

арт. 341 — апаганьванне будынкаў і псаванне маёмасці;

342 — падрыхтоўка дзеянняў, што груба парушаюць грамадскі парадак, альбо актыўны ўдзел у іх;

361 — заклікі да дзеянняў, скіраваных на прычыненне шкоды нацыянальнай бяспецы;

361¹ — стварэнне экстрэмісцкага фарміравання або ўдзел у ім;

361⁴ — садзейнічанне экстрэмісцкай дзейнасці;

367 — паклёп у дачыненні да прэзідэнта;

368 — абраза прэзідэнта.