“Белпошта“ ўтрая знізіла тарыф на перадачу даных пасля ўмяшання МАРГ

1 кастрычніка, Позірк. Міністэрства антыманапольнага рэгулявання і гандлю прызнала дзяржаўнае прадпрыемства “Белпошта“ парушальнікам антыманапольнага заканадаўства праз завышаную плату за перадачу даных аб паштовых адпраўленнях, якія рэгіструюцца, у адзіную аўтаматызаваную сістэму ўліку і захоўвання даных.

“Белпошта“ займае дамінуючае становішча на рынку паштовых паслуг. Паводле ацэнкі антыманапольнага ведамства, усталяваная прадпрыемствам стаўка перавышала “суму неабходных для аказання паслугі выдаткаў і прыбытку“.

З верасня 2025 года па сакавік 2026-га выдаткі на перадачу даных у нацыянальнага паштовага аператара істотна знізіліся. Пры гэтым аб’ём інфармацыі вырас, а састаў карыстальнікаў паслугі змяніўся. Гэта дазваляла зменшыць кошт, аднак кампанія працягвала выкарыстоўваць ранейшую стаўку, адзначае МАРГ.

Па выніках разбіральніцтва міністэрства прызнала дзеянні “Белпошты“ парушэннем і прымяніла “антыманапольны інструментарый“. У выніку кошт перадачы даных для аператараў паштовай сувязі знізіўся ўтрая — з 15 да 5 капеек.