Рыжанкоў выступіў у ААН з прарасійскай прамовай — абвінаваціў ЕС у “гульні ў салдацікі” ва Украіне, згадаў “першапрычыны” вайны

27 верасня, Позірк. З прарасійскай і антызаходняй прамовай выступіў міністр замежных спраў Беларусі Максім Рыжанкоў 26 чэрвеня ў Нью-Ёрку на агульнапалітычнай дыскусіі 81-й сесіі Генеральнай Асамблеі ААН.

Дыскусія называлася “Аднаўляючы давер, кіруючы пераўтварэннямі: ААН, якая працуе ў інтарэсах усіх”, тэкст прамовы Рыжанкова апублікаваны на сайце МЗС.

“Давер паміж дзяржавамі сёння знаходзіцца на самым нізкім узроўні з часоў Халоднай вайны. Неабходныя пераўтварэнні прабуксоўваюць. Усё больш раздаецца галасоў, што ААН не працуе ў інтарэсах усіх і не здольная кіраваць пераменамі”, — сказаў беларускі міністр.

Так адбываецца, сказаў ён, праз тое, што дзяржавы — члены ААН “загразлі ў дыскусіях бясконцых”, так і не прадаставіўшы арганізацыі “рэальнай магчымасці дзейнічаць”. У выніку наступіў “сістэмны крызіс міжнародных адносін”.

“Свет захлёстваюць войны і канфлікты, — заявіў прамоўца. — Яны забіраюць жыцці, падзяляюць сем’і, ператвараюць квітнеючыя гарады ў руіны, спараджаюць усё новыя хвалі масавай вымушанай міграцыі. Руйнуюцца глабальныя ланцужкі паставак. Энергетычны крызіс пераплятаецца з харчовым. Усё гэта асабліва б’е па найбольш уразлівых пластах насельніцтва”.

“Як жа мы дайшлі да такога пункту?” — задаўся пытаннем Рыжанкоў. І адказаў: “Гэта заканамерны вынік дзеянняў асобных дзяржаў па мэтанакіраваным падрыве сістэмы міжнародных адносін”.

“Асобныя дзяржавы”, як вынікае з выступу кіраўніка МЗС, належаць да “калектыўнага Захаду”, які, паводле яго сцвярджэння, імкнецца “жыць за кошт іншых”.

Захад, адзначыў ён, ігнаруе міжнароднае права, прымушае ўсіх “дзейнічаць на падставе так званых правілаў”, “разбурае непажаданыя краіны і душыць непакорлівыя народы”.

“Гэтыя правілы — як знакі ў горадзе, які яны самі спраектавалі. Сабе — заўсёды зялёнае святло. Усім астатнім — чырвонае. Але справа не ў метафарах. Справа ў фактах, якія вядомыя кожнаму. Югаславія, Ірак, Лівія, Сірыя, Венесуэла, Куба, Іран, Палестына — вось далёка не ўся геаграфія краін, якія былі або застаюцца ў фокусе сквапнага заходняй цікавасці”, — сказаў Рыжанкоў, згадаўшы заадно і “несправядлівы глабальны гандаль, дзе правілы пішуцца пад інтарэсы транснацыянальных карпарацый”.

Таксама ён звярнуў увагу на “незаконныя аднабаковыя санкцыі, якія душаць цэлыя народы”.

“Асабліва трывожыць” міністра “палітыка кіраўніцтва Еўрасаюза, якое праз нястрымнае імкненне захаваць усё меншае дамінаванне спрабуе перашкаджаць глабальнай стабільнасці і падтрыманню міру”.

“Хіба самі народы Еўропы прагнуць нейкага рэваншу над Расіяй, а тым больш коштам уласнага збяднення? Вядома ж не. Яны хіба хочуць быць гарматным мясам у вайне, якую нібыта еўрапейскія палітыкі, як кажуць, рыхтуюць да 2030 года? Таксама не. І мы пра гэта ведаем. Але ў Брусэлі камусьці вельмі хочацца пагуляць у салдацікі, замацаваць сваю веліч у гісторыі”, — адзначыў кіраўнік знешнепалітычнага ведамства.

Далей Рыжанкоў фактычна абвінаваціў краіны Захаду ў развязванні вайны ва Украіне, якую пры падтрымцы Мінска чатыры з паловай гады вядзе Крэмль. “Хіба ЕС там імкнецца да міру? — сказаў ён. — Яго мэта, як яны кажуць, — нанесці цывілізацыйную паразу Расіі. Аслабіць, зняважыць, зламаць і далей жыць за кошт расійскіх рэсурсаў. Але не коштам жыцця сваіх грамадзян, а цяпер коштам жыцця простых украінцаў”.

Такая вайна “ім выгадная”, дадаў дакладчык, бо яна “дазваляе стварыць вобраз ворага, мабілізаваць уласнае насельніцтва на падставе калектыўнай пагрозы, спісаць эканамічныя правалы, <…> апраўдаць мілітарызацыю і, вядома, узбагаціцца”.

“Таму і патрэбны канфлікт — кіраваны, замарожаны, вечны”, — заявіў Рыжанкоў.

Таксама ён абвінаваціў ЕС у “палітыцы неакаланіялізму”, стварэнні “новай жалезнай заслоны” на мяжы з Беларуссю і Расіяй, традыцыйна для ўладаў у Мінску і прапаганды назваў еўрапейцаў “нашчадкамі” Адольфа Гітлера.

Падкрэсліўшы, што ААН “не адпавядае рэаліям сённяшняга дня”, Рыжанкоў прапанаваў рэфармаваць арганізацыю. У Беларусі, паводле яго слоў, для гэтага “ёсць рэцэпт”, які “вельмі просты”. “Асобныя краіны свету павінны спыніць выкарыстоўваць арганізацыю <…> у сваіх эгаістычных мэтах, павінны задумацца пра лёс нашай агульнай планеты ў цэлым”, — дадаў ён.

У якасці “канкрэтных крокаў” прадстаўнік Мінска прапанаваў правесці рэформу Савета бяспекі ААН, “аднавіць павагу” да Статута ААН, змяніць працу шэрагу арганізацый — Сусветнага банка, Міжнароднага валютнага фонду і інш.

Гаворачы пра гатоўнасць Мінска ўнесці “свой уклад у стварэнне новага свету”, Рыжанкоў сказаў, што “Беларусь заўсёды была і застаецца краінай міру”.

“Мы даказалі сваю здольнасць выступаць у якасці надзейнай дагаворнай пляцоўкі. Мы гатовыя і далей рабіць усё магчымае для хутчэйшага дасягнення міру ва Украіне. Але будзем шчырыя: любы ўстойлівы мір у гэтай краіне немагчымы без ліквідацыі першапрычын*, якія гадамі ігнараваліся. Гэта і планы па ўключэнні Украіны ў НАТО насуперак усім рэаліям бяспекі.  Гэта і невыкананне Мінскіх пагадненняў, якія былі адзіным легітымным шляхам да міру”, — падкрэсліў міністр.

“Бясконцая напампоўка Украіны зброяй”, паводле яго сцвярджэння, вядзе “толькі да знішчэння самой Украіны і яе народа”.

Таксама Рыжанкоў заявіў пра гатоўнасць рэжыму Аляксандра Лукашэнкі да “супрацоўніцтва з усімі зацікаўленымі краінамі”, але пры адсутнасці з іх боку “ціску, дыктату, ультыматумаў і незаконных санкцый”.

* — пра “першапрычыны” вайны ва Украіне часта заяўляюць прэзідэнт РФ Уладзімір Пуцін і іншыя прадстаўнікі Крамля. Паводле іх слоў, ліквідацыя гэтых “першапрычын” з’яўляецца неабходнай умовай спынення расійскай агрэсіі ва Украіне. Дэ-факта пад “першапрычынамі” маецца на ўвазе незалежная ад Масквы палітыка Кіева, а іх ухіленне магчыма пры ўмове капітуляцыі украінскай дзяржавы.