Вячорка і Шыянок абмеркавалі з прадстаўнікамі МЗС і Офіса прэзідэнта Чэхіі падтрымку беларусаў у гэтай краіне

10 верасня, Позірк. Сітуацыю с палітвязнямі ў Беларусі, санкцыйную палітыку ў дачыненні да рэжыму Аляксандра Лукашэнкі, падтрымку беларускіх дэмакратычных сіл і беларусаў у Чэхіі абмеркавалі з генеральным дырэктарам еўрапейскай секцыі чэшскага МЗС Ханай Губачкавай ды прадстаўнікамі Офіса прэзідэнта гэтай краіны галоўны дарадца Святланы Ціханоўскай Франак Вячорка і кіраўніца Офіса беларускіх дэмсіл у Праге Крысціна Шыянок.

Паводле інфармацыі прэс-службы Ціханоўскай, сустрэча адбылася ў рамках візіту Вячоркі ў Чэхію (8–9 верасня).

“Чэшскі бок пацвердзіў, што неўзабаве сваякі беларусаў, якія жывуць у Чэхіі, змогуць атрымліваць візы, — гаворыцца ў паведамленні. — Гэта стала вынікам сустрэчы Святланы Ціханоўскай з міністрам замежных справаў Чэхіі Пэтрам Мацынкам, а таксама намаганняў беларускай дыяспары”.

Бакі, як адзначаецца, таксама абмеркавалі “магчымасць падтрымкі рэпрэсаваных праз Міжнародны гуманітарны фонд, падтрымку беларускіх грамадскіх ініцыятыў і далейшую супрацу з Офісам беларускіх дэмакратычных сіл у Чэхіі”.

Як паведамляў “Позірк”, 11 жніўня чэшскае МЗС накіравала на міжведамаснае ўзгадненне праект пастановы ўрада, згодна з якім сваякі грамадзян Беларусі, якія стала або часова пражываюць у Чэхіі, атрымаюць права на кароткатэрміновыя візы ў гэтую краіну.

Паведамляецца, што Вячорка падчас выступіў на панэлі па аднаўленні Украіны ў рамках Канферэнцыі па ўсходняй палітыцы Чэхіі. “Галоўны мэсэдж: аднаўленне і бяспека Украіны непасрэдна звязаныя з будучыняй Беларусі. Дэмакратычная Беларусь павінна стаць бяспечным паўночным суседам Украіны, а не расійскім ваенным плацдармам”, — адзначыла прэс-служба Ціханоўскай.

Офіс беларускіх дэмсіл у Чэхіі, Асацыяцыя па міжнародных пытаннях (AMO) ды беларускі накірунак Фонда Конрада Адэнаўэра арганізавалі асобную дыскусію “Ад Оршы 1514 года да Бахмута і Аўдзееўкі: чаму беларусы зноў ваююць?”, прысвечаную “беларуска-ўкраінскім стаскнкам і гістарычнаму супрацьстаянню расійскай экспансіі”.

“Вячорка падкрэсліў, што беларусы сёння ваююць за Украіну не толькі з салідарнасці: перамога Украіны — у нацыянальных інтарэсах Беларусі, бо аслабленне расійскага імперыялізму адкрывае магчымасць для вызвалення самой Беларусі”, — гаворыцца ў паведамленні.

Заяўлена, што ў Празе галоўны дарадца Ціханоўскай таксама “сустрэўся з прадстаўнікамі грамадзянскай супольнасці і беларускай дыяспары”.