Група дэпутатаў Вярхоўнай Рады: Лёс незалежнай Беларусі вырашаецца таксама на фронце ва Украіне

25 жніўня, Позірк. Пра сувязь лёсу незалежнай беларускай дзяржавы з вынікам вайны Расіі супраць Украіны гаворыцца ў звароце міжфракцыйнай групы Вярхоўнай Рады “За дэмакратычную Беларусь” з нагоды 35-й гадавіны надання Дэкларацыі аб дзяржаўным суверэнітэце Беларусі статусу канстытуцыйнага закона.

У дакуменце 25 жніўня называецца “Днём незалежнасці Беларусі”.

“Сёння лёс незалежнай Беларусі вырашаецца таксама на фронце ва Украіне”, — падкрэсліла дэпутацкая група. Аўтары звароту адзначылі, што беларускія добраахвотнікі ў складзе Сіл абароны Украіны “са зброяй у руках змагаюцца супраць расійскага імперыялізму, абараняючы не толькі Украіну, але і будучыню свабоднай Беларусі”.

Украінскія дэпутаты заявілі, што сёння суверэнітэт Беларусі “сістэмна знішчаецца рэжымам Аляксандра Лукашэнкі і залежнасцю ад Расійскай Федэрацыі”.

“Беларусь ператвораная ў ваенны плацдарм для расійскай агрэсіі супраць Украіны, а яе тэрыторыя выкарыстоўваецца супраць суседніх дзяржаў”, — гаворыцца ў звароце.

Дэпутацкае аб’яднанне заявіла, што ўлады ў Мінску “паслядоўна знішчаюць беларускую нацыянальную ідэнтычнасць”, грамадзян краіны пераследуюць за выкарыстанне гістарычнай і нацыянальнай сімволікі ды палітычныя погляды.

Асобна парламентарыі пракаментавалі апошнія выпадкі вызвалення беларускіх палітвязняў, заявіўшы, што гэтыя крокі не азначаюць спынення рэпрэсій.

“Вызваленне сотняў людзей не скасоўвае самой сістэмы рэпрэсій: палітычныя пераследы працягваюцца, а беларусаў і надалей пазбаўляюць волі за права адкрыта выступаць супраць дыктатуры”, — гаворыцца ў дакуменце.

Будучую Беларусь украінскія дэпутаты бачаць як “суверэнную, дэмакратычную і еўрапейскую краіну, свабодную ад дыктатуры і знешняга кантролю”.

“Верым, што над Мінскам зноў будзе лунаць бел-чырвона-белы сцяг, палітычныя вязні вернуцца дадому, а беларускі народ зможа святкаваць сваю незалежнасць у свабоднай і дэмакратычнай дзяржаве”, — адзначылі аўтары звароту.

25 жніўня 1991 года Вярхоўны Савет БССР надаў Дэкларацыі аб дзяржаўным суверэнітэце статус канстытуцыйнага закона. 19 верасня таго ж года БССР атрымала назву Рэспубліка Беларусь.