Пракуратура Мінска адсправаздачылася пра прызнанне некалькіх дзяцей асобамі ў сацыяльна небяспечным становішчы

7 жніўня, Позірк. Пракуратура Мінска адсправаздачылася пра прызнанне некалькіх дзяцей асобамі ў сацыяльна небяспечным становішчы (СНС). У паведамленні Генеральнай пракуратуры са спасылкай на службу інфармацыі сталічнай пракуратуры прыводзіцца некалькі прыкладаў.

У прыватнасці, на падставе прадпісання пракурора Заводскага раёна двое дзяцей 2012 і 2018 гадоў нараджэння адабраныя ў бацькоў, якія злоўжываюць алкаголем, і змешчаныя на дзяржаўнае забеспячэнне. Раней дзеці былі прызнаныя асобамі ў СНС, аднак “бацькі, якія вядуць амаральны лад жыцця, не здзейснілі спробаў змяніцца”.

Адзначаецца, што ў студзені 2026 года дзеці сталі відавочцамі канфлікту, падчас якога іх маці нанесла нажавое раненне бацьку аднаго з дзяцей.

Яшчэ адзін прыклад — работнік пракуратуры Кастрычніцкага раёна наведаў сям’ю, дзе жыве дзяўчынка 2018 года нараджэння. Яна была прызнаная асобай з патрэбай у дзяржаўнай абароне, і адабраная ў маці. Праз некаторы час дзіцяці дазволілі вярнуцца дадому.

Аднак падчас візіту пракурор высветліў, што маці дзіцяці не працуе. Жанчына была “з рэшткавымі прыкметамі алкагольнага ап’янення”, а яе брат — п’яны. У жылым памяшканні “адчуваўся выяўлены пах алкаголю”, санітарна-гігіенічныя ўмовы “не адпавядалі вызначаным патрабаванням”. Пракурор ініцыяваў сацыяльнае расследаванне, у выніку дзіця прызнана асобай у СНС.

Паведамляецца таксама, што пачалося сацыяльнае расследаванне ў дачыненні да дзвюх сем’яў. У адной з іх пяцёра дзяцей (чацвёра — малалетнія). Падставай сталі “злоўжыванне алкагольнымі напоямі і гвалт у дачыненні да жонкі”. Аналагічныя абставіны высветленыя ў сям’і дзяўчынкі 2018 года нараджэння. У абодвух выпадках дзеці прызнаныя асобамі ў СНС.

Сацыяльныя службы актывізаваліся пасля забойства бацькамі трохгадовага Сямёна Таратуты ў Слуцку (Мінская вобласць) у кастрычніку 2023 года. У дачыненні да службовых асоб, у абавязкі якіх уваходзіла прафілактыка сямейнага недабрабыту, была распачатая крымінальная справа. Бацьку дзіцяці Аляксандру Таратуту вынесены смяротны прыгавор, маці Анастасія Таратута прыгавораная да 25 гадоў пазбаўлення волі ва ўмовах строгага рэжыму.

Актывізацыі сацыяльных службаў таксама паспрыяла задушэнне маці чатырох сваіх дзяцей у лютым 2024 года ў Баранавічах (Брэсцкая вобласць).

У снежні 2023 года былі змененыя правілы прызнання дзяцей асобамі ў сацыяльна небяспечным становішчы. Адным з новых крытэрыяў стала адсутнасць афіцыйнага працаўладкавання ў абодвух бацькоў.

Пад дзеянне новых правілаў рызыкуюць трапіць бацькі, якія пераследуюцца з палітычных матываў: калі яны былі прыцягнутыя да адміністрацыйнай адказнасці за “прапаганду або публічнае дэманстраванне, выраб, распаўсюд нацысцкай сімволікі або атрыбутыкі” (арт. 19.10 КаАП; да такой улады дэ-факта адносяць нацыянальную бел-чырвона-белую сімволіку); “распаўсюд, выраб, захоўванне, перавозку інфармацыйнай прадукцыі, якая ўтрымлівае заклікі да экстрэмісцкай дзейнасці або прапагандуе такую дзейнасць” (арт. 19.11 КаАП); “незаконны выраб і (або) распаўсюд методык або іншых матэрыялаў пра спосабы вырабу выбуховых прылад і выбуховых рэчываў” (арт. 19.12 КаАП).