У ліпені ў Гродзенскай вобласці выпала паўтары месячныя нормы ападкаў, у Гомельскай — менш за 60%

6 жніўня, Позірк. Аб нераўнамерным размеркаванні ападкаў у ліпені паведамляе Белгідрамет у справаздачы за месяц.

Калі ў Гродзенскай вобласці выпала 133 мм (133 л вады на квадратны метр тэрыторыі), або 150% нормы для рэгіёна, то ў Гомельскай — 58 мм, або 59% нормы.

У сярэднім па краіне выпала 96 мм ападкаў — 107% нормы. Найбольш іх было ў першай дэкадзе — 48 мм (159% нормы для гэтага перыяду), у другой і трэцяй дэкадах назіраўся недабор — 86% і 75% нормы адпаведна (27 і 22 мм).

1 ліпеня ў Валожыне і 11 ліпеня ў Горках назіраўся вельмі моцны лівень з колькасцю ападкаў 35 і 31 мм. У Лідзе быў град дыяметрам да 1 см (дата не называецца).

У Салігорску 13 ліпеня вецер дасягаў 34 м/с (122,4 км/г).

Па тэмпературы ліпеня апынуўся халадней за норму на 0,7 градуса (18,2 супраць 18,9). У 2025 годзе ліпень быў цяплейшы за норму на 0,9 градуса (19,8 градуса), у 2024-м — на 2,1 (21), у 2023-м — халаднейшы на 0,3 (18,6).

Максімальная тэмпература паветра была адзначана днём 1 ліпеня ў Кобрыне — 37,1 градуса. У Івацэвічах і Пружанах абнавіліся месячныя экстрэмумы — 36,1 градуса ў абодвух гарадах (адпаведна 35,6 градуса 17 ліпеня 2001 года і 36 градусаў 31 ліпеня 1994-га).

Найхаладней было 18 ліпеня ў Брагіне — 6 градусаў.

Максімальная тэмпература ў ліпені была ніжэй, чым у чэрвені і жніўні. 29 чэрвеня ў Пінску паветра прагрэлася да 40,4 градуса (новы гістарычны максімум для ўсёй краіны), 6 жніўня ў Мазыры тэмпература перавысіла 39-градусную адзнаку (канчатковы паказчык стане вядомы пасля 22 гадзін).