У Сенненскім раёне 62-гадовая жанчына пагражала забіць сужыцеля — распачатая крымінальная справа

6 жніўня, Позірк. Пракуратура Сенненскага раёна распачала крымінальную справу прыватна-публічнага абвінавачання паводле арт. 186 КК (пагроза забойствам) у дачыненні да 62-гадовай мясцовай жыхаркі, паведаміла прэс-служба Генеральнай пракуратуры.

Паводле інфармацыі ведамства, справа распачатая ў рамках гэтай працэдуры, бо пацярпелы, як было высветлена, знаходзіцца ў залежным становішчы ад сужыцелькі — жыве ў доме, які належыць ёй, і не мае іншага жылля, што “абмяжоўвае яго магчымасць самастойна абараняць свае правы і законныя інтарэсы”.

Згодна з матэрыяламі справы, жанчына падчас бытавога канфлікту “нанесла цялесныя пашкоджанні свайму сужыцелю, пасля чаго прыставіла да яго жывата нож і стала пагражаць яму забойствам”. Нож з рук жанчыны своечасова выбіла “трэцяя асоба”.

У аснове канфлікту была бытавая сварка — мужчына, як заяўляецца, “не выканаў абяцанне скасіць траву ля дома і пайшоў да знаёмага для распіцця спіртных напояў”.

Пракуратура звярнула ўвагу на тое, што “аналіз асобы жанчыны сведчыць пра высокую рызыку здзяйснення ёю супрацьпраўных дзеянняў у сямейна-бытавой сферы”. “Яна схільная да злоўжывання спіртнымі напоямі, мае неаднаразовыя судзімасці, раней прыцягвалася да адміністрацыйнай адказнасці, у тым ліку за парушэнне грамадскага парадку”, — гаворыцца ў паведамленні.

Адзначаецца, што сітуацыя патрабуе “сістэмнага кантролю з боку праваахоўных органаў і рэалізацыі комплексу прафілактычных мер па папярэджанні хатняга гвалту”.

Папярэдняе расследаванне справы правядзе раённы аддзел Следчага камітэта.

Штогод у Беларусі фіксуецца каля 80 тыс. паведамленняў пра хатні гвалт, звычайна гвалтаўнікамі з’яўляюцца мужчыны.

У верасні 2021 года Вярхоўны суд ліквідаваў міжнароднае грамадскае аб’яднанне “Гендэрныя перспектывы”, якое займалася праблемамі хатняга гвалту і палавой дыскрымінацыі.

9 сакавіка 2022 года Мінскі гарадскі суд ліквідаваў грамадскае аб’яднанне “Радзіслава”, якое дапамагала жанчынам, што пацярпелі ад гвалту.

У Беларусі няма закона аб супрацьдзеянні хатняму гвалту. Праект адпаведнага дакумента распрацоўваўся некалькі разоў. У кастрычніку 2018 года чарговы варыянт рэзка раскрытыкаваў Аляксандр Лукашэнка, назваўшы яго “бздурай, узятай найперш з Захаду”.

Дзяржаўныя СМІ замацоўваюць у прапагандысцкіх матэрыялах гендарную няроўнасць як сацыяльную норму.