У Мазырскім раёне патануў 4-гадовы хлопчык

7 жніўня, Позірк. Увечары 6 жніўня ў Мазырскім раёне (Гомельская вобласць) патануў 4-гадовы хлопчык, паведамляе прэс-служба Следчага камітэта.

Паводле інфармацыі ведамства, дзіця з пачатку лета гасцявала ў бабулі ў вёсцы Балажэвічы. Незаўважна для дарослых яно выйшла з двара на вуліцу.

Родныя пачалі шукаць хлопчыка. На беразе копані, злучанай з ракой Прыпяць, за домам яны знайшлі рэчы дзіцяці і паведамілі пра здарэнне ў МНС. Вадалазы, што прыбылі на месца, дасталі цела дзіцяці з вады.

Следчы разам са спецыялістам Дзяржаўнага камітэта судовых экспертыз агледзеў месца здарэння. Апытаныя відавочцы, прызначаная судова-медыцынская экспертыза.

У справе разбіраецца Мазырскі раённы аддзел СК.

5 жніўня паведамлялася, што ў Магілёве патануў 14-гадовы хлопец. Паводле звестак ведамства, кампанія падлеткаў прыехала на возера Святое. Падчас купання адзін з іх “сышоў пад ваду”.

У сярэдзіне ліпеня “Позірк” паведамляў, што, паводле даных МНС, за пяць гадоў (2021–2025) у беларускіх вадаёмах патанула 1.984 чалавекі, у тым ліку 132 дзіцяці. Асобна ў 2025 годзе — 282 (12).

Летась доля патанулых у афіцыйны купальны сезон (з 1 траўня па 30 верасня), склала 56% (дзеці — 58%). 59% ахвяр перад утапленнем знаходзілася ў стане алкагольнага ап’янення.