Спецыялісты аднавілі электразабеспячэнне прыкладна ў чвэрці абясточаных населеных пунктаў Мінскай вобласці

7 жніўня, Позірк. На 10:45 спецыялісты працягвалі аднаўляць электразабеспячэнне ў 214 населеных пунктах Мінскай вобласці, якія пацярпелі ад непагадзі ў ноч на 7 жніўня, паведамляе прэс-служба прадпрыемства “Мінскэнерга”.

Раней арганізацыя паведамляла, што на 8:00 без электрычнасці заставаліся 288 населеных пунктаў. Такім чынам, электразабеспячэнне адноўленае прыкладна ў чвэрці раней абясточаных населеных пунктаў.

Паведамляецца, што аднаўленнем падачы электраэнергіі займаецца 312 спецыялістаў, задзейнічана 125 адзінак спецыялізаванай тэхнікі і 16 перасоўных дызельных электрастанцый.

“Найбольш складаная абстаноўка захоўваецца ў Вілейскім раёне — ён застаецца найбольш пацярпелым праз маштабы пашкоджанняў сетак, — адзначыла “Мінскэнерга”. — Электразабеспячэнне на цяперашні момант адсутнічае ў 146 населеных пунктах раёна. Для аператыўнага рэагавання створаны штаб пад кіраўніцтвам губернатара (старшыні Мінаблвыканкама Аляксея Кушнарэнкі. — “Позірк”.) і з удзелам памочніка прэзідэнта Аляксандра Кохана, датычных службаў”.

“Мінскэнерга” трымае сітуацыю на пастаянным кантролі і робіць усё магчымае, каб мінімізаваць час перапынку электразабеспячэння”, — запэўніла арганізацыя.