Ворыхава абраная кіраўніком міжнароднай камісіі КР

31 ліпеня, Позірк. Член фракцыі “Наступ” Маргарыта Ворыхава ўзначаліла міжнародную камісію Каардынацыйнай рады (КР).

Як паведамляецца ў тэлеграм-канале КР, яна перамагла ў другім туры выбараў, набраўшы 40 галасоў дэлегатаў. За яе апанента Ксенію Луцкіну (“Еўрапейскі выбар”) прагаласаваў 31 дэлегат.

30 ліпеня Ворыхава заявіла аб сыходзе з пасады прадстаўніка Аб’яднанага пераходнага кабінета па маладзёжнай палітыцы.

Тады яна адзначыла, што плануе “заняцца стварэннем арганізацыйных і тэхналагічных асноў, якія будуць патрэбныя беларускім дэмакратычным сілам у бліжэйшыя гады”.

Раней 31 ліпеня КР паведаміла, што камісію па рэформах і падрыхтоўцы пераходнага перыяду ўзначаліць Юрый Губарэвіч, камісію па этыцы — Аляксей Міхалевіч. Абодва прадстаўляюць фракцыю “Латушка і рух “За Свабоду”.