Двое членаў экалагічнай кааліцыі Green Network прыгавораны да 6 гадоў зняволення

27 ліпеня, Позірк. Члены экалагічнай ініцыятывы Green Network (“Зялёная сетка“), палітвязні Глеб Герасімовіч і Аляксандр Мількамановіч прыгавораныя да 6 гадоў пазбаўлення волі ва ўмовах узмоцненага рэжыму, паведамляе праваабарончы цэнтр “Вясна“.

Згодна з інфармацыяй праваабаронцаў, кожны з іх таксама аштрафаваны на 500 базавых велічыняў (22,5 тыс. рублёў).

За выключэннем таго, што спачатку мужчын абвінавачвалі паводле арт. 361⁴ КК (садзейнічанне экстрэмісцкай дзейнасці), а вінаватымі яны прызнаны паводле ч. 2 арт. 361¹ (удзел у экстрэмісцкім фармаванні), “Вясне” пра працэс больш нічога невядома.

Крымінальная справа звязаная з рашэннем Камітэта дзяржаўнай бяспекі, які 30 ліпеня 2025 года прызнаў кааліцыю ініцыятыў Green Network “экстрэмісцкім фарміраваннем”.

У кантэксце “фарміравання” КДБ згадаў акаўнты “Зялёнай сеткі” ў “Інстаграме” і “Тэлеграме”, тэлеграм-канал “Экадом”, чат “Экачат”, бот Belarus Beehive і сайт belarusbeehive.eu. Датычнымі да яго апрача Герасімовіча і Мількамановіча былі названыя Наталля Герасімава і Яраслаў Бекіш.

Паводле інфармацыі “Вясны”, Герасімовіч і Мількамановіч сярод іншага з’яўляюцца заснавальнікамі беларускай стартап-школы Malimon.

“Зялёная Сетка” раней пазіцыянавала сябе як таварыства экалагічных арганізацый і экаактывістаў Беларусі, у якое ўваходзяць эксперты, валанцёры і ініцыятыўныя групы, а таксама актывісты, аб’яднаныя агульнай мэтай — “зрабіць Беларусь зялёнай, дэмакратычнай і квітнеючай краінай”.

Адзначалася, што мэта экалагічнага руху заключаецца ў тым, каб “садзейнічаць трансфармацыі Беларусі ў дэмакратычную і экалагічна ўстойлівую краіну для жыцця”. У рамках гэтага рэалізоўваліся праграмы і праекты ў сферы аховы прыроды і ўстойлівага развіцця.

“Зялёная сетка” падтрымлівала актывістаў зялёнага руху, асвятляла і ацэньвала дзейнасць актараў, якія ўплываюць на экалагічны і грамадзянскі парадак дня, падвышала патэнцыял грамадзянскай супольнасці, укараняла і маштабавала інавацыйныя рашэнні ў галіне абароны прыроды і ўстойлівага развіцця.

У чэрвені 2026 года “Экадом” паведамляў, што з 2021-га ў Беларусі прымусова ліквідавана больш за 80 экалагічных арганізацый, яшчэ каля 60 спынілі працу самастойна праз ціск з боку ўладаў.