Альпініст з Беларусі загінуў у Швейцарыі, сарваўшыся з вяршыні Матэрхорн у Альпах

14 ліпеня, Позірк. Пра двух загінуўшых альпіністаў (грамадзянах Беларусі і Ізраіля), якія сарваліся з вяршыні Матэрхорн у Альпах, паведамілі швейцарскія СМІ.

Як адзначае партал bluewin.ch, са спасылкай на пракуратуру швейцарскага кантона Вале, трагедыя адбылася прыкладна аб 11 гадзіне 12 ліпеня на вышыні каля 4.030 метраў. У момант падзення мужчыны спускаліся з вяршыні.

Сведкі паведамілі, што бачылі, як два чалавекі сарваліся “ў выніку каменяпаду“.

Паведамляецца, што ратавальная аперацыя з выкарыстаннем верталётаў доўжылася каля чатырох гадзін.

Паводле інфармацыі беларускіх дзяржСМІ, Міністэрства замежных спраў пацвердзіла гібель суайчынніка.

Матэрхорн — вяршыня ў Пенінскіх Альпах на мяжы Швейцарыі і Італіі. Вышыня вяршыні складае 4.478 метраў над узроўнем мора.