Мінск працягвае пазбягаць рыторыкі Крамля, якая выстаўляе Украіну пагрозай для Беларусі — ISW
3 ліпеня, Позірк. Беларускія ўлады “працягваюць пазбягаць выкарыстання рыторыкі Крамля, якая выстаўляе Украіну як пагрозу для Беларусі”, гаворыцца ў справаздачы амерыканскага Інстытута вывучэння вайны (ISW).
Эксперты зрабілі такую выснову, прааналізаваўшы заявы афіцыйных асоб пасля таго, як 2 ліпеня ў пункце пропуску Чырвоны камень на мяжы Гомельскай вобласці Беларусі і Бранскай вобласці РФ пад удар трапіў беларускі аўтобус, што рухаўся з Мінска ў Анапу.
В.а. губернатара Бранскай вобласці Ягор Кавальчук, звярнуў увагу ISW, адразу заявіў, што па аўтобусе ўдарылі ўкраінскія сілы. У той жа час дзяржсакратар Савета бяспекі Беларусі Аляксандр Вальфовіч, пацвердзіўшы факт удару, “не стаў казаць пра яго паходжанне і, у прыватнасці, не ўсклаў адказнасць за яго на ўкраінскія сілы”.
На думку аналітыкаў, як і ў выпадку з аўтобусам з беларускімі дзецьмі, які трапіў пад удар 17 чэрвеня ў Бранскай вобласці, расійскія ўлады могуць выкарыстоўваць апошні інцыдэнт, каб “апраўдаць будучыя ўдары вялікай далёкасці па Украіне”.
Першымі пра напад 2 ліпеня паведамілі расійскія тэлеграм-каналы, у тым ліку тыя, што распаўсюджваюць інсайдэрскую інфармацыю і меркавана звязаныя са спецслужбамі РФ. Яны абвінавацілі ў здарэнні Узброеныя сілы Украіны. Пасля інфармацыя з’явілася ў СМІ Расіі і Беларусі (беларускі тэлеканал “Першы інфармацыйны” паведаміў, што ад удару таксама пацярпелі тры беларускія фуры — “адна з іх згарэла цалкам”).
Улады Украіны сваё дачыненне да здарэння адмаўляюць.
У выніку ўдару два кіроўцы і адзін пасажыр атрымалі лёгкія раненні. Усе яны былі аператыўна дастаўленыя ў Гомельскую абласную клінічную бальніцу, але пасля адмовы ад шпіталізацыі былі адпушчаныя дадому.
17 чэрвеня аўтобус з выхаванцамі рэчыцкай дзіцяча-юнацкай спартыўнай школы № 2 (Гомельская вобласць) трапіў пад удар у Бранскай вобласці РФ. У транспартным сродку, які накіроўваўся з Рэчыцы ў Геленджык, знаходзілася 44 пасажыры, з іх 28 дзяцей-спартсменаў 2014–2015 гадоў нараджэння. Там жа былі ўдзельнікі мясцовай танцавальнай студыі.
Сярод тых, хто суправаджаў дзяцей, была жонка трэнера з Рэчыцкай ДЮСШ-2 Вікторыя Гарошка, яна загінула.
Расійскі і беларускі бакі абвінавацілі ў атацы Украіну, у Кіеве дачыненне да інцыдэнту адмаўляюць.
