У выступе з нагоды Дня Незалежнасці Турчын успомніў аб прынятай “35 гадоў таму” Дэкларацыі аб дзяржаўным суверэнітэце

2 ліпеня, Позірк. “Вызначальным фактарам“, які дазваляе “з упэўненасцю глядзець у будучыню“ і “будаваць моцную і квітнеючую дзяржаву”, назваў суверэнітэт прэм’ер-міністр Аляксандр Турчын, выступаючы 2 ліпеня ў Мінску на ўрачыстым сходзе, прысвечаным Дню Незалежнасці (адзначаецца 3 ліпеня).

“35 гадоў таму, з прыняццем Дэкларацыі аб дзяржаўным суверэнітэце, пачаўся самастойны шлях нашай маладой незалежнай дзяржавы. Гэты час быў напоўнены пераадоленнем сур’ёзных выклікаў, пошукам свайго ўнікальнага шляху, захаваннем духоўных і маральных арыенціраў“, — цытуе Турчына прэс-служба ўрада.

“Мы адстаялі права на свой суверэнны і свабодны шлях развіцця ваеннымі і працоўнымі подзвігамі, цаной неймаверных намаганняў і мільёнаў чалавечых жыццяў. Таму заканамерна волевыяўленне беларускага народа аб тым, каб Дзень Незалежнасці святкаваўся ў дзень вызвалення ад нямецка-фашысцкіх захопнікаў сталіцы нашай Радзімы, горада-героя Мінска. Тры з паловай дзесяцігоддзі ў летапісе дзяржавы — гэта менш, чым імгненне. Але, калі ўдумацца, за такое гістарычнае імгненне мы здзейснілі эпахальны рывок наперад“, — сказаў прэм’ер.

Дэкларацыя аб дзяржаўным суверэнітэце, пра якую згадаў Турчын, была прынятая Вярхоўным Саветам БССР амаль 36 гадоў таму, 27 ліпеня 1990 года. 25 жніўня 1991 года, неўзабаве пасля правалу путчу ў СССР, дакументу быў нададзены статус канстытуцыйнага закона.

З 1991 па 1996 год Дзень Незалежнасці ў Беларусі адзначаўся менавіта 27 ліпеня.

24 лістапада 1996 года па ініцыятыве Аляксандра Лукашэнкі на рэферэндум было вынесена пытанне аб пераносе свята на 3 ліпеня — Дзень вызвалення Мінска ад нямецка-фашысцкіх захопнікаў у 1944 годзе. У падтрымку гэтай прапановы, як было заяўлена, выказалася 88,18% удзельнікаў рэферэндуму. З 1997 года Дзень Незалежнасці адзначаецца 3 ліпеня.